Tagapagmana

Sandaling natigilan si Don Vicente, tila hindi agad naproseso ng kanyang 

matandang utak ang narinig. Ngunit nang mag-sink in ang lahat, unti-unting namula ang 

kanyang mukha bago galit na bumaling kay Radleigh Ross. 

"Totoo ba ang sinasabi ng babaeng ito?!" 

Walang emosyon ang mukha ni Radleigh Ross, tila ba isang estatwang gawa sa yelo. Hindi 

siya gumalaw, wala siyang balak magpaliwanag o ipagtanggol ang sarili. 

BLAG! 

Malakas at marahas na ibinaba ng matanda ang tasa ng kape sa mesa, dahilan upang 

tumapon ang mainit na likido sa mamahaling hardwood.  

"Gago ka talagang bata ka! Ano-anong klaseng dumi at basura na lang ba ang idinarating 

mo sa pamamahay ko?!" 

"Hindi po ako dumi o basura, Don Vicente," mariin at seryosong sabat ni Astherielle,  

Humakbang siya palapit sa sofa ng matanda at buong tapang na tumitig sa mga mata nito.  

"Dahil ang babaeng tinatawag ninyong basura ngayon... ang siya ring nagdadalang-tao sa 

susunod na tagapagmana ng buong imperyo ng mga Del Fierro." 

Parang may sumabog na bomba sa loob ng silid. Nabalot ng nakaririndíng tensyon ang 

paligid. Si Flynne Asarga ay napaurong na lamang sa tabi ng matanda, namumutla ang 

mukha at nanginginig ang mga kamay sa matinding gulat at kahihiyan habang nakatitig kay 

Astherielle. 

"Anong sabi mo?!" tumayo ang Matandang Don, nanginginig ang kamay na nakaturo kay 

Astherielle, habang ang kabilang kamay ay napahawak sa kanyang dibdib dahil sa biglaang 

altapresyon.  

"Buntis ka?" 

"Opo. Isang oras pa lang ang nakalilipas mula nang lumabas ang DNA at medical test mula 

sa pinakapribadong ospital sa bansa," kumindat si Astherielle kay Radleigh, na tila ba 

sinasabing: O ayan, ginawa ko na ang parte ko. Ihanda mo na ang isang bilyon. 

Hinarap ng matanda si Radleigh Ross nang may nanunumbat at nagliliyab na tingin. 

"Totoo ba ito, Radleigh?! Nabuntis mo ang isang ligaw na babae kapalit ng kasunduan natin 

sa mga Asarga?!" 

Dahan-dahang tumayo si Radleigh Ross mula sa sofa. Ang kanyang matikas, naglalakihan, 

at nagbabantang tindig ay nagdulot agad ng nakalulunod na bigat sa paligid. Sa isang 

marahas, biglaan, ngunit labis na possessive na galaw, ipinalupot ni Radleigh ang kanyang 

malaking kamay sa balingkinitang baywang ng dalaga. Mariin niya itong hinila padikit sa 

kanyang matikas at nag-aalab na katawan, bago tumingin sa kanyang lolo nang may 

mapang-api at nakatutunaw na ngisi. 

"Gaya ng narinig mo, Lolo. Buntis siya... sa anak ko," mababa, paos, ngunit may mariing 

awtoridad na sagot ni Radleigh. 

"Kaya huwag na nating ituloy ang kasunduan ninyo ng mga Asarga. Dahil ang nag-iisang 

babaeng papasok sa pamilyang ito bilang asawa ko, ay ang babaeng nagdadala ng susunod 

na pinuno ng mga Del Fierro. At siya 'yon." 

Napakuyom na lamang ng palad si Flynne sa matinding kahihiyan habang si Don Vicente 

naman ay napaupo pabalik sa sofa, nanginginig ang kamay habang nakatitig sa dalawang 

taong hayagang sumira sa kanyang mga plano. 

"Umalis na kayo..." nanginginig at mahina ang boses ng matanda, "Umalis kayo sa harap ko 

bago ko kayo ipapatay!" 

Tumango nang bahagya si Radleigh Ross bilang paggalang bago hinila si Astherielle 

palabas ng mansiyon. 

Pagkapasok na pagkapasok sa loob ng kotse, marahas na binitiwan ni Radleigh ang 

baywang ni Astherielle, dahilan upang maumpog nang bahagya ang balikat ng dalaga sa 

p***o ng sasakyan.

"Aray naman! May pakabayani-bayani ka pang nalalaman sa loob, tapos dito sa labas 

mananakit ka?!" singhal ni Astherielle habang hinahawakan ang kanyang balikat. 

Hindi siya pinansin ng lalaki. Agad na kumuha si Radleigh Ross ng basang sanitizing towel 

at marahas na pinunasan ang kanyang palad, na tila ba nadumihan at nandidiri siya nang 

hawakan ang balat ng dalaga. 

Lumapit siya rito nang husto, halos idikit ang kanyang mukha sa profile ng lalaki.  

"Bakit? May karapatan ka bang madiri sa akin? Sa tingin mo ba gustong-gusto kong 

magpahawak sa 'yo?!" 

Isang sarkastikong sulyap ang ibinigay ni Radleigh, ang kanyang mga mata ay naging 

madilim at mapanganib.  

"Subukan mong idikit muli ang mga kuko mo sa akin... at sisiguraduhin kong puputulin ko 

'yan." 

"Napakasungit! Salbahe!" Binalingan ni Astherielle ang driver sa harap.  

"Andrei, ihatid mo kami sa City Hall. Magpapakasal na kami ng Boss mo!" 

“Ihatid ang babaeng yan sa bahay nila, Andrei" malamig na utos ni Radleigh. 

"Radleigh Ross!" Naningkit ang mga mata ni Astherielle sa galit, ang kanyang dibdib ay 

mabilis na umaangat sa matinding emosyon.  

"Sabi mo kanina sa ospital, kapag sumama ako sa 'yo at hinarap ang lolo mo, hindi mo 

ipapalaglag ang bata! Ginawa ko ang parte ko! Ginalit ko ang matanda, pinalayas mo si 

Flynne, tapos ngayon gaganituhin mo ako?!" 

"Ang sabi ko, hindi ko papatayin ang bata. Pero wala akong sinabing pakakasalan kita." 

"Wala kang sinabi?! Eh ano 'yong drama mo sa loob kanina? Na ako lang ang nag-iisang 

babaeng papasok sa pamilya niyo? Na ako ang magiging asawa mo? Gaguhan lang ba 

'yon?!" 

"Nagsisinungaling ako sa harap ng matandang 'yon para sirain ang mga plano niya," isang 

mapait at nakatatakot na tawa ang kumawala sa lalamunan ni Radleigh.  

"At sa oras na matapos ang laro... ikaw ang unang-una kong papatayin, Astherielle. Huwag 

mong isipin na dahil dinala kita rito ay ligtas ka na." 

"Kung ganoon, bakit hindi mo pa gawin ngayon?!" Hinawakan ni Astherielle ang kuwelyo ng 

polo ni Radleigh, hinila ito palapit sa kaniya nang may nag-aalab na galit at panggigigil.  

"Patayin mo ako! Pero babalaan kita, Radleigh... kapag namatay ako, kasama mong 

mamamatay ang kumpanya ninyo dahil isisiwalat ng Papa ko ang lahat ng dumi mo! At mas 

lalong hinding-hindi mo malalaman kung paano takasan ang lolo mo!" 

Mariing hinawakan ni Radleigh ang magkabilang pulso ng dalaga, pinisil iyon sa antas na 

halos magmula ang pasa. Inilapit niya ang kanyang mukha sa mukha ni Astherielle, sapat 

para maramdaman ng dalaga ang kanyang mainit at nagpupuyos na hininga. 

"Masyado kang matalino para sa sarili mong kapakanan, Astherielle," bulong ng lalaki, ang 

boses ay paos ngunit punong-puno ng panganib at pagnanasa. "Ano ba talaga ang alam 

mo?" 

"Alam ko na ang pagpilit sa 'yo ng lolo mo na pakasalan si Flynne Asarga ay hindi para sa 

negosyo... kundi para maglagay ng espiya sa kama mo gabi-gabi para bantayan ang bawat 

transaksyong ginagawa mo sa likod niya. Isang maling galaw mo, pwede ka niyang 

patalsikin bilang pinuno ng mga Del Fierro." 

Bahagyang natigilan si Radleigh. Ang higpit ng hawak niya sa pulso ng dalaga ay hindi 

nagbago, ngunit may kuryenteng gumapang sa pagitan nilang dalawa. 

"At ako lang ang pwedeng maging kalasag mo," pagpapatuloy ni Astherielle, ang boses ay 

naging isang mapang-akit na bulong. 

"Dahil ako lang ang may tunay na ebidensya—buntis ako sa tunay mong anak. Sa oras na 

magpakasal tayo, legal mong matatakasan ang kontrol ng matanda nang hindi ka pwedeng 

patalsikin." 

"Kung ang ama mo ay may kalahati man lang ng utak mo, Astherielle... hindi sana magiging 

pulubi ang pamilya niyo ngayon," bulong ng lalaki, dahan-dahang binibitiwan ang pulso ng 

dalaga ngunit nananatiling nakatitig sa kanyang mga labi. 

Muling sumilay ang mapang-akit na ngiti sa mga labi ni Astherielle, binalewala ang insulto. 

Lumapit pa siya nang husto, sapat para sumayad ang kanyang dibdib sa matikas na 

katawan ng lalaki.  

"Kaya naman, Boss Radleigh... magpapakasal ba tayo o..." Isang mapang-uyam ngunit 

nakalulunod na ngisi ang sumilay sa mga labi ng dalaga. "...gusto mong subukan kung 

gaano ko kabilis kayang sirain ang imperyong pinoprotektahan mo gamit lang batang nasa 

sinapupunan ko!!?