قضية طرد

قضية طرد

صوت خطوات

(الأم) يافتاح ياعليم يارزاق ياكريم اصطبحنا واصطبح الملك لله يلا لما أقوم أفتح البلكونة اهو الشمس تدخل تشمس الفرشة شوية

صوت باب يفتح

(الأم) يالهوي واد (يامحمد) ايه مقعدك بدري كده في البلكونة ودخلت امتى ياوله مسمعتكش

(محمد) يتثائب بصوت عالي

والله يأمي أنا قاعد من إمبارح هنا لسه منمتش ولا دقيقة

(الأم) يالهوي ياوله ليه ياخويا قاعد هنا من إمبارح متكونش ياوله أم العيال طرداك ولا حاجة ولا مستخبي من الديانة اللي واقفين على الباب وتضحك (بتريقة)

(محمد) ياريت يأمه يبقى عندي بيت وعيال والله نفسي اتجوز وأكون أسرة بقى اللي قدي عندهم كام عيل دلوقت

(الأم) وايه حايشك مش أبوك قالك اختار واحنا تحت أمرك

(محمد) اختارت يأمة خلاص الحمد لله

(الأم) يا صلاة النبي ياصلاة النبي بجد ياوله أيوة كده خلي الفرح يخش بيتنا ويارب يخش برجله اليمين

(محمد) ايوة ياما بجد والله

(الأم) طيب فرحني ياوله قول هي مين بنت الحلال؟

(محمد) سهير يامه

(الأم) ايوة سهير مين ياحبيبي حد نعرفه مين أبوها مين أمها مين عيلتها يعني ياوله قول التفاصيل ولا هتنقطني كلمة كلمة خلص

(محمد) لا يأمه سهير بنت عم إسماعيل عوضين مأنت عرفاه نسايب ابن خالتي

(الأم) مين ليه ؟ يامصيبتي

(محمد) هو مين وليه دي يأمه وليه بتفولي في وشي ربنا يكفينا شر المصايب

(الأم) ملقتش غير دي ده حتى لا شكل ولا منظر دي معصعصة زي عود القصب

(محمد) الحب ياما الحب

(الأم) ال ايه يأخويا حبك بورص حب ايه ياوله ودي فيها ايه يتحب شعرها الأكرت ولا بوزها الأبرم

(محمد) ياماما حرام عليك ومتنسيش أنت عندك بنت

(الأم) منسيتش ياوله عندي بنت بس بنتي حلوة تتحب طالعة لامها

(محمد) آه من يشهد للعروسة!

(الأم) عروسة مين ياوله؟ لك عرسة تأكلك

يعني يوم ماتنقي تنقي بنت اسماعين عوضين ده ياوله الله يرحمك يابا كان بيقول عليهم استغفر الله العظيم مش عارفة أقولها ازاي بس هخليني مؤدبة وهقولها بشكل محترم جدك ياوله كان بيقول عليهم دول إذا دخلوا الحمام يجوعوا

عينهم فارغة وبخلة جلدة جلدة ياوله مع إن معهم فلوس كثير بس جربة بيدعوا الفقر على طول مفيش مفيش منين

(محمد) يأمه حرام عليكي مهو إبراهيم ابن خالتي سامية متجوز اختها الكبيرة

(الأم) آه ياوله إبراهيم ابن أختي متجوز بنتها الكبيرة بس خالتك بتعيط ليل نهار من عمايل مراته فيه ده ياوله زي الخاتم في صوباعها

ومبهدل أمه دايما عشان خاطرها ملقتش الا دي مهم البنات كثير زي الهم على القلب

(محمد) ثاني يأمه بتشهدي لخالتي يأمه دول ناس كويسين جدا

(الأم) ياحبيبي ومين بقى اللي قالك انهم كويسين جدا أكيد حد بيكرهك قوي وعاوز يشمت فيك بالجوازة الهم دي

ياوله ده عمتها أخت أبوها مليونيرة وراحت عملت شهادة فقر عشان مرات ابنها متاخدش نفقة كبيرة لبنتها شوفت الغلب أكثر من كده عاوز ايه

دول يتأمنوا ازاي ياوله

(محمد) وأنا مالي ومال عمتها هو أنا هتجوز عمتها

(الأم) ياوله والله العظيم البت وارثة طباع عيلتها والمثل بيقول اكفي القدرة على فمها تطلع البت لأمها

(محمد) أهو أنت اللي قلتي لأمها مش عمتها

(الأم) هقول ايه أنت معمول لك غسيل مخ

(محمد) من مين يأمي إبراهيم ابن خالتي بيشكر فيهم خالص

(الأم) ياوله ياحمار ابن خالتك طالع عينه منهم اسألني أنا ده خالتك بتحكي عنهم العجب وهو ولد مكار عاوزك تشاركه الهم اللي هو فيه عشان تعيش عيشته الهباب ياوله أنا عرفاه كويس مبيحبش حد يبقي أحسن منه وعاوزك تدوق المرار الطافح اللي هو عايشه بدل م يحذرك منهم عاوزك تغرق زيه

(محمد) لا بقي أنت كده ظالمة يأما

(الأم) أنا ظالمة بكرة تندم على عدم سماع كلامي ياوله خالتك بتقول بوريه منهم بوريه م بهدلنها ومضيعين شقا الوله إبراهيم دول ناس جعانة يابني كفاية لحسة واحدة من المغرفة ليه عاوزهم يبقوا اثنين ونندم بعد كده ليه بس حرام عليك؟

(محمد) يوه ياما مش هتجوز غيرها لا تقولي خالتي ولا غيره هتجوز سهير يعني هتجوز سهير

(الأم) هتندم يامحمد

(محمد) لما ابقى أجي اشتكي لك ابقي اطرديني

(الأم) ماشي يامحمد بس خليك فاكر أنا حذرتك من العالم الجعانة دي أم عين فارغة يابني ده المثل بيقول على الأصل دور ودول لا أصل ولا فصل

(محمد) ثاني يأمه بحبها بحبها ياناس

(الام) طيب براحتك اللي بيشيل قربة مخرومة بتخر على دماغه بس بعد كده متجيش تعيط وتقول إني محذرتكش

(محمد) طيب أقولهم هتروحي لهم امتى

(الأم) مستعجل قوي على قضاك يابني اصبر

(محمد) خلاص بقى يأمه

(الأم) طيب أشور أبوك الأول

(محمد) لا يأمه أنت الكل في الكل وإذا قلتي لأبويا شمال يبقي شمال وإذا قلتي يمين يبقي يمين

(الأم) طيب يافالح لما ابوك يرجع من البحر على الغدا ابقى أكلمه وأرد عليك هو قال ايه

(محمد) ثاني يأما ماقلنا البركة فيك أقول للناس هتروحي لهم امتى

(الأم) لما أشور خالتك وأشوفها فاضية امتى عشان تيجي معايا هي عرفاهم أكثر مني وأهي تسندني قدامهم

(محمد) لا ياما بلاش خالتي روحي لوحدك

(الأم) عاوزني أروح لوحدي عشان يستفردوا بيا وياكلوني لا ياحبيبي أنا هاخد أختي معايا تكون في ضهري

(محمد) طيب خدي أختي بلاش خالتي

(الأم) ايه ياوله هي خالتك الوقتي بقت كُخة لا مش رايحة من غير أختي يلا غور من وشي روح ورشتك

(محمد) ورشة ايه يأما هو أنا شايف قدامي أنا هدخل أنام شوية وبعدين أروح الورشة بس قولي أقولهم هتروحي لهم الساعة كام؟

(الأم) كام في عينك قلت لما أشور أبوك وخالتك وبعدين أقرر وأقولك

(محمد) خلاص يأما هقولهم إنك هتروحي لهم بعد المغرب النهاردة

(الأم) مستعجل قوي يأخويا

(محمد) أيوة يأما مستعجل بحب يأما بحب امال إذا مكنتيش متجوزة أبويا عن حب

(الأم) آه عن حب حبك بورص هو حب اليومين دول حب الحب كان زمان مش في أيامكم اللي مش باين لها شكل ولا لون

امشي يلا انزل الورشة

(محمد) لا أنا رايح أكلم حماتي وبعدين أنام شوية وبعد الغدا انزل الورشة

(الأم) حما الدبب ياشيخ هي لحقت تبقي حماتك يظهر أنهم عاملين لك غسيل مخ يلا امشي من قدامي خليني أرفع التندة خلي الشمس تدخل الأوضة

صوت رفع التنده ثم صوت خطوات

(الأم) تطلب أختها صوت طلب الرقم وصوت جرس

(الأم) ازيك ياسامية وحشاني يابت أيه هو أنا إذا متصلتش بك يابت ياوحشة متعبرنيش

(سامية) والله يأختي مشاغل

(الأم) طيب اسمعيني كويس الواد محمد عاوز يتجوز البت المعصعصة أخت مرات ابنك أيه رأيك؟

(سامية) بلاش ياختي بلاش دول ناس هم ميتعشروش بُخلة وجعانين

والبت قوية وجبارة زي أختها دول جلدة فظاع بلاش منهم دول عبيد القرش ومش مهم الفلوس تيجي منين المهم ياخدوها بلاش عشان خاطري كفاية مغرفة واحدة من الحلة