Kabanata 1

MAGSASAYAW para mabuhay. Iyon lamang ang ginagawa ni Maya tuwing sasapit ang gabi. Tama. Nagsasayaw siya sa isang bar, at iyon ang pinagkukuhanan niya ng pera. Hindi lamang siya basta-bastang mananayaw dahil isa rin siyang prôstitute. Maraming lalaki ang sumasama sa kaniya sa kama, bagay na lalo niyang ikinasasaya dahil malaki ang kinikita niya rito.

Mahirap ang trabahong iyon, ngunit kailangan niya iyong gawin para sa kaniyang isang taong gulang na anak. May anak siya dahil nabuntis siya ng lalaking hindi naman siya pinanagutan. Ano pa ba ang magagawa niya? Isa lamang siyang hamak na prostitute.

Nakaupo siya sa harap ng isang salamin habang nakakalat sa mesa ang iba't ibang make-up. Inaayos niya ang sarili dahil siya na ang susunod na magpe-perform sa stage. Habang nag-aayos, biglang dumating ang kaibigan niyang dancer din sa bar na si Pamela.

“Maya, ikaw na pala ang susunod? Galingan mo dahil mukhang jackpot ang gabing ito,” saad nito.

Itinigil niya ang pagme-make-up at mabilis na inikot ang upuan paharap sa kaibigan.

“Ano namang ibig mong sabihin?” usisa niya.

“Nakita ko kasi ang mga lalaking naroon. Mukhang mayayaman silang lahat, at may nakita pa akong isang hottie,” kinikilig na saad ni Pamela na ikinangisi na lamang niya.

“Ano naman ngayon? Huwag ka ngang tanga, Pam! Puro mayayaman talaga ang nagpupunta rito. Wala akong pakialam sa hottie na sinasabi mo. Huwag mo nga akong istorbohin dahil ako na ang susunod!” inis niyang saad habang mabilis na iniharap muli ang upuan sa salamin at ipinagpatuloy ang ginagawa.

“Sorry naman!”

Narinig pa niya ang boses ng kaibigan, ngunit hindi na niya ito sinagot. Baka kasi tawagin na siya agad ng momshie nila.

“Maya, ikaw na!”

Ayan na nga. Narinig niya ang tinig ng kanilang momshie na si Caren. Nang tingnan niya ito sa salamin, nakabusangot itong nakatingin sa kaniya.

“Opo, susunod na po ako, Momshie Caren.”

Dali-dali niyang inayos ang sarili at pinagmasdan ang mukha sa salamin. Nang makuntento, agad siyang humarap dito.

“Tara na po,” nakangiti niyang saad.

Tinanguhan lamang siya nito.

NAKAKAENGGANYONG tugtog ang umaalingawngaw sa buong lugar. Nasa gitna ng stage si Maya habang unti-unting ginagalaw ang kaniyang katawan. Sumasabay siya sa saliw ng isang romantikong kanta. Iyon ang araw-araw niyang ginagawa—ang magsayaw ng bagay na itinuturing ng iba na malaswa.

Humakbang siya nang bahagya pasulong. Naroon ang isang pole na siya niyang susunod na gagamitin. Dahan-dahan siyang umakyat dito at iwinagayway ang mga kamay na tila isang modelo. Marami pa siyang ipinakitang galaw bago tuluyang bumaba.

Doon nagsimulang maghagis ng pera ang mga lalaking nanonood sa kaniya. May mga matanda at mayroon ding mga binatang sa tantiya niya ay kasing-edad lamang niya. Nasiyahan siya kaya lalo pa niyang pinagbuti ang pagsasayaw. Napakaseksi ng kaniyang suot dahil two-piece lamang iyon kaya aliw na aliw ang mga lalaki.

Hanggang sa may isang bagay na umagaw sa kaniyang atensyon.

Isang guwapong lalaki.

Sa tantiya niya, iyon lamang yata ang pinakaguwapong lalaking naroon. Napakagat-labi siya habang pinagmamasdan ito. Ang lalaki naman ay napailing at muling uminom ng alak.