الفصل ٨

الفصل ٨

كانت أسماء بتتكلم، وملك بتقطع الخضروات وتجهز الأكل بسرعة: بيض بالبسطرمة، بيض مقلي ومسلوق، بطاطس محمرة.. وسألتها:

— عندك سجق؟ الأكل بيطلع تحفة بيه.

شافت لفة سجق في الثلاجة وفرحت، وبدأت تجهزها فورًا.

اتعجبت أسماء من سرعتها وقالت:

— إيه اللي بتعمليه ده؟ الباشا أكله صحي، وكل ده كتير عليه!

ما سمعتهاش ملك، وجهزت السفرة كاملة وقالت بصوت عالي:

— الأكل جاهز يا باشا!

جاء فارس وهو جعان وقال بابتسامة:

— أخيرًا.. أنا جعان أوى، إيه التأخير ده كله؟

نظرت له ملك بغيظ وقالت:

— تأخير؟ والله العظيم أحلف إنك مش هتاكل منه.

تنهد فارس وقال:

— خلاص بقا.. ما يكنش قلبك أسود.. أنا جعان فعلاً.

ومد يده على الأكل، فضربت ملك على يده بخفة:

— استنى لما الباشا الوسيم يجي الأول.

تنهد فارس وقال:

— أنا كمان وسيم على فكرة.. ولا انتِ مش شايفة غيره؟

ركزت ملك في ملامحه شوية وقالت:

— تصدق.. فيكم شبه من بعض، بس هو بردو الباشا الوسيم أكتر.

ابتسم فهد اللي كان وصل للتو وبدا عليه شوية ضيق، وقال:

— يلا ناكل.. ولازم تقيم الأكل يا فارس، ده شرطي.

بدأ فارس يأكل ويمدح:

— الله.. إيه الطعم الحلو ده؟ ما كنتش متصور إنك شاطرة للدرجة دي زي ما بتقولي.

ابتسمت ملك بخجل:

— عشان بس تعرف يا باشا الوسيم إني شاطرة.. أرجوك اقبل أشتغل عندك.

نظر لها فهد وما رد، وكمل أكله. وفارس فضل يسألها إزاي اتعلمت الطبخ، لكن ملك سابته وراحت لفهد وسألته بقلق:

— إيه يا باشا.. الأكل مش عاجبك؟

رد فارس بسرعة قبل ما فهد يتكلم:

— صدقيني.. طعمه حلو جداً.

شعر فهد بالضيق من هزار فارس المتكرر ومن فضوله يعرف كل حاجة عن ملك، وقال بنبرة قريبة من العصبية:

— مش عشان سمحت لك تفطر معانا تفضل تمدح فيها كتير.. كل وانت ساكت. ده مجرد تجربة فطار، وفي الغدا هنحكم تمام.

تنهدت ملك بحزن وقالت:

— ولو ما عجبكش هترجعني صح؟ خلاص.. شكراً جداً إنك أنقذتني، بس أنا ممكن أرجع بلدي، وأرجع لمصنع الكرتون اللي كنت بشتغل فيه.

اتعصب فهد لما حس إنها ممكن تسيب المكان وقال:

— دخول الحمام مش زي خروجه يا ماما.. اتفقنا إني أنقذك مقابل إنك تسمعي الكلام، مفهوم؟

نزلت دموع ملك وقالت:

— مفهوم.. تحب أعمل إيه على الغدا يا باشا؟

رد عليها بعصبية:

— أي زفت!

شهقت ملك وضربت على صدرها بطريقة طفولية:

— ياهوي عليا.. هو انت بتاكل زفت البهايم؟ إزاي يا باشا؟ ده مضر ومش كويس أبدًا!

انفجر الكل في الضحك، وحتى فهد ما قدرش يمسك نفسه.

قربت منها أسماء عشان تفهمها إنها غلطت، وقالت لها بهمس:

— يا ملك.. الباشا كان بيقول «أي حاجة» بس..

لكن ملك فضلت تهمس لنفسها:

— ليه يا باشا بياكل زفت.. غريب أمره..

في وسط الضحك، سأل فارس فهد:

— هو انت أنقذتها من إيه يا ترى؟ عشان كده بتتحكم فيها كده؟

قام فهد من على السفرة وقال بحدة:

— لو عايز تقعد، بلاش أسئلة كتير، مفهوم؟ وبلاش الهزار الزيادة معاها.. هي مجرد خادمة، فلا تعطيهاش قيمة زيادة عن اللزوم.

نظر له فارس بتعجب وقال:

— سبحان الله.. دلوقتي عرفنا الفرق بين المقام والمقام.. الدرس كان قاسي شوية، بس لسانك طويل زي ما قلت.

وضحك وقال:

— بس تصدق.. أنا فرحان إنها جت عندك.. هتعلمك الأدب. ومتنساش تقول لها إيه تحضر على الغدا، عشان ما تسافر بلدها وتجيب لك «زفت»..

كتم فهد ضحكته وتركه وراح ناحية المطبخ.

 

كانت ملك شايفة نظرات أسماء وشروطها الصعبة، وحست إنها مخنوقة وبدأت تعيط.

سألتها أسماء:

— بتعيطي ليه بس؟ شرحت لك إنك لو زعلته متجدليش.. بس ليه تسألي عن «الزفت»؟

ردت ملك وهي بتعيط:

— أنا عمري ما بقصد أغلط.. وعارفة إن لساني هو السبب في كل حاجة وصلت لها.. و«فهمي» هو اللي قال لي كده بنفسه.

سألتها أسماء باهتمام:

— مين فهمي ده؟ حبيبك؟

ردت ملك بعنف:

— لا طبعًا.. عمري ما بصيت له.. ابن الجزمة ده كان عشيق مرات عمي، وباعني..

قاطع كلامهم صوت فهد العالي:

— هتفضلوا ترغوا كتير؟ ومين اللي هيشيل بقا الأكل من على السفرة؟

اعتذرت أسماء وقالت:

— آسفة يا باشا.. أنا رايحة أشيله حالاً، تعالي يا ملك.

وقفها فهد ومسك يدها وقال:

— لا.. ملك هتيجي معايا لوحدها.

اتخضت ملك وزادت دموعها وقالت وهي بتترجاه:

— أرجوك يا باشا.. أوعى ترجعني تاني.. والله هسمع الكلام..

سحبها فهد، وكانت هي خايفة ورجليها بتترعش، وبدأت تترجاه:

— أرجوك، أوعى ترجعني عند اعتماد! الله يكرمك، ربنا ينور طريقك ويعلي مراتبك، ويبعد كل الشر عنك، ويصلح حالك ويبارك في أحبابك.

كتم فهد الضحك، ورسم على وشه نظرة صارمة، وقال:

— هو انتي بتشحتي على باب السيدة زينب؟ ما تستهدي كدا! أنا مش برجع في وعدي، لكن امشي من غير ما تتكلمي. والله العظيم لو فتحت بوقك لحد ما نوصل، لكون...

قبل ما يكمل كلامه، حطت ملك إيدها على بوقها، واتكلمت من تحت إيدها:

— أهوه! مش هتكلم ولا أفتح بوقي، وهامشي ساكتة.

نزع إيدها من عليه، وهو بيحاول يخبئ ضحكته، ومشي وشاور لها تمشي وراه. بعد شوية، ظهرت قدامهم حديقة واسعة مليانة أشجار، وبعدها بركة مياه صافية، وفوقها كوبري صغير مصنوع من ألواح الخشب. فتحت ملك بوقها من دهشة المنظر — خصوصًا الزهور اللي كانت نابتة على جنبي البركة — وشهقت بصوت عالي:

— هو أنا متّ وروحت على الجنة صح؟ وانت الحارس اللي جاي تاخدني هناك، وبعدين ترميني في النار صح؟ طيب أنا متى موت؟ واسماء دي حورية؟ والدكتور مين؟ أوعى يكون الشيطان! طيب ممكن تسبني هنا شوية؟ مش عاوزة أروح النار... والجسر ده هو الخيط الرفيع اللي الناس بتقول عليه، يعني ممكن أقع منه بسهولة صح؟

جلس فهد على كرسي في ظل شجرة، وعلى جنبه منضدة، وانتظرها تعدي، وابتسم على كلامها، وقال:

— هو انتي مش ناويه تيجي؟ بطلي رغي، جنة إيه ونار إيه يا بنتي؟ إيه الكلام اللي بتقوليه ده؟ وعقلك كان فين لما وصفتني بالملاك الحارس؟ والدكتور اللي أنقذ حياتك بقي فجأة شيطان؟ يالهوي عليكِ! ومالك بالنار أصلاً؟ هو عملتي حاجة غلط في حياتك؟

نظرت له ملك، وابتسمت بفرحة:

— يعني المكان ده حقيقي ومش في الجنة؟ طيب أعدّي إزاي؟ خايفة أتكعبل وأقع في الميه!

ضحك على طريقتها وهي بتمشي ببطء وتهز جسمها على الكوبري، وكأنها عمدًا عايزة تقع. صاح عليها بصوت عالي:

— تعالي يا ملك، انجزي! مش فاضي وعايز أتكلم معاكِ كلمتين.

أخيرًا وصلت عنده بصعوبة، بس لما قربت اتكعبلت ووقعت فوق جسمه مباشرة، وكأنها في حضنه. رفع إيده ببطء عشان يبعد شعرها عن وشها، وكل نفسه كان عايز يضمها لكن كبح جماح نفسه. قامت بسرعة تعدل وقفتها، وهو قلبه بيدق بسرعة كل ما تقرب منه. اتكلم بعدها بنبرة جادة لكن فيها رقة مخفية:

— انتي ليه مش بتسمعي كلامي وتعليماتي؟

اتعجبت ملك، وقالت:

— تعليمات إيه؟ هو انت قلت لي حاجة النهارده؟ انت طول الوقت ساكت أو غضبان! — وقلدت ملامحه وطريقة مشيته ونظرته بالظبط، فضحك هو وملكش قادر يمسك نفسه.

— طيب اقعدي، عايز نتكلم على راحتنا.

جلست، وحطت إيدها على المنضدة وراحت راسها فوقها، وقالت ببراءة:

— الله، ضحكتك حلوة قوي، بتغير شكلك تمامًا عن ما تكون مكشر.

قاطعها وقال:

— لما أكون مكشر ببقى زي الشيطان صح؟

ردت بسرعة:

— لا طبعًا! انت عمرك ما تكون شيطان، انت اللي أنقذتني منهم — وإن كان فيهم ناس كويسين برضه. مهاب مثلًا، كان بيربط إيدي وكنت بشتمه وأتف في وشه، لكن مكنش بيزيد في الحاجة وبيعملها برفق. ومراد كنت أحس أحيانًا إنه طيب، خصوصًا لما كان يجيب لي أكل سرقة، بس لما كانت هدير تضبطه، كان بيتعصب ويغير أسلوبه عشان متشكش فيه... أما هدير فكانت...

قاطعها بسرعة:

— اهدي شوية يا بنتي، كل دول نسيتني عايز أقولك إيه من كتر الرغي! وده بالظبط اللي عايز أتكلم فيه: بعتلك رسالة مع أسماء تقولك متتكلميش مع حد عن أي حاجة تخصك، ولا منين جيتي، بس انت كأنك مش واخدة بالك أبدًا.

نظرت له بعيون بريئة، وهي ما زالت على وضعها:

— آه، كانت بتقول حاجة زي كده، بس بصراحة كنت مركزة في تحضير الفطار فما انتبهتش قوي. كل اللي فاكراه إنها ذكرت اسمين: فهد وفارس. ولما سألتها "مين فهد؟" قالت: "اللي هتشتغلي خادمة عنده". فبقيت أسأل نفسي: انت مين فيهم؟ فهد ولا فارس؟

تتبع