الفصل الثاني

السلام عليكم أصدقاء 🌙

أولاً شكراً بزاف لأنكم دخلتوا تقروا هاد القصة.

هاد الرواية كاتبها من قلبي وبالدارجة ديالنا، فيها الغموض، الأحاسيس، والأسرار اللي ضايع بين الماضي والحاضر.

أي كلمة منكم ، تعليق أو رأي، راه كيهمّني وكتشجعني نكمّل الطريق معاكم فصل بفصل.

نتمنى تعيشوا مع ريان وليان وإياد، وتحسّو بكل لحظة كما حسّيتها وأنا كنكتب.

مرحبا بكم فالعالم الصغير ديال هاد القصة... ونوّروه بكلماتكم الزوينين. 🤍

ـــــــــــــــــــــــــــــــــــــــــ

تسللت أشعة الشمس من بين الستائر الحريرية، وانعكست على أرضية الرخام اللامعة، بينما كان الهدوء كيعم أرجاء القصر.

كل شيء كان مرتب بعناية...

الخدم كيتحركو بصمت، وكل واحد منهم عارف المهمة ديالو.

فالطابق الثاني...

وقف شاب قدام الشرجم، كيشوف الجردة الواسعة اللي كانت كتحيط بالقصر من كل الجهات.

كان هادئ...هادئ بزاف

كيبان لأي واحد يشوفو أنه شخص ما كيعرفش التوتر.

صون تلفونو اللي فوق الطاولة.

ابتسم وهو شدو.

ولكن قبل ما يجاوب...

تجمد مكانه.

شد صدره بيده، وتنفس بصعوبة.

غمض عينيه، وكأن الألم كيشق جسدو من الداخل.

بقى ساكت...

كيحاول يتغلب عليه بوحده.

بعد ثواني، دخلات الأم لالة حليمة.

أول ما شافت وجهه، تبدلت ملامحها.

- إياد... رجعات؟

فتح عينيه بسرعة، وحاول يبتسم.

- غير دوخة بسيطة، الوليدة... متقلقيش راسك .

قربات منه وهي كتلمس جبينه.

- وجهك صفر... هاد الشي ما بقاش كيطمني.

قبل ما يجاوب، دخل الأب سي دريس.

وقف قدام ولده، وتأمل ملامحو للحظات.

- نمشيو للطبيب.

تنهد إياد، وهز راسو بالنفي.

- لا... عارف هاد الألم، غادي يفوت بعد شوية.

- ولكن...

قاطعهم بابتسامة خفيفة، وهو كيحاول يخفف الجو.

- إلى بقيت كل مرة كنحس فيها بشوية لوجع نمشي للسبيطار، غادي نولي عندهم موظف ماشي مريض هههه.

ابتسمت الأم رغم خوفها عليه .

أما الأب، فبقي ساكت كان عارف ولدو... وعارفو أنه عنيد.

بعد دقائق، شرب الدواء اللي متعود عليه.

كلس بهدوء، وبدا لون وجهه كيرجع طبيعي بالتدريج.

وقف، عدل ياقة قميصه، وشد سوارت طموبيل.

- غادي نمشي للشركة، عندي اجتماع مهم.

سي دريس قال بنبرة حازمة:

- إلى رجع الألم، غادي تمشي للطبيب بلا نقاش.

هز إياد راسو بالموافقة، وخرج.

لكن...

فأول ما وصل لطوموبيل، وقف للحظة.

حس بوخزة غريبة فرأسه.

غمض عينيه.

وللحظة قصيرة جدًا.... شاف طفل صغير واقف وسط المطر.

ما بانش وجهه.

وما نطق حتى بكلمة.

غير كان كيشوف فيه...

فتح إياد عينيه بسرعة.

شاف من حولو

ما كان حتى واحد .

تنهد وهو كيحاول يقنع راسو.

- واضح أن الإرهاق بدا كيأثر عليا...

ركب السيارة، ومشى.

ــــــــــــــــــــــــــــ

كان صوت العصافير أول حاجة فاقت عليها ليان.

فتحت عينيها بشوية، وبقات لحظات كتشوف في سقف قبل ما تتذكر أنها خاصها تنوض.

مدات يدها لتلفون.

- يا لطيف... تعطلت !

ناضت بسرعة، وبدات كتوجد راسها وهي كتجري بين الغرفة والمرآة.

من لتحت، كان صوت الأم ديالها لالة مينة كيوصل حتى للفوق.

- ليان... الفطور واجد، غادي يبرد!

- جاية ا ماما!

هبطات وهي كتعدل شعرها، لقات الأم ديالها كتوجد طبلة، والأب سي حمد كالس كيقرا الجريدة.

ابتسمت ليهم.

- صباح الخير.

الأم شافتها وضحكات.

- صباح الخير؟ الساعة قربات للعشرة وانتي باقي كتقولي صباح الخير؟

كلست ليان وهي كتضحك.

- راه غير شويا نعس وصافي .

الأب حرك راسو وهو كيتبسم.

- نتي من صغرك وانتي عزيز عليك نعاس كتنعسي بزااف.

قبل ما تجاوب، مشات لالة مينة لكرسي لخاوي

تنهدت.

- ريان مازال ما هبطش

شفت ليان فالساعة.

- أكيد باقي خدام الفوق فشي حاجة... هو ديما هكا.

الأم هزات راسها.

- منين كان صغير وهو ما كيعرفش يرتاح.

ابتسمت ليان.

- هادي هي المشكلة ديالو... كيبغي يحمل الدنيا فوق كتافو.

وفنفس اللحظة.... سمعو خطوات نازلة من الدروج.

التفتو كاملين.

كان ريان نازل بهدوء، لابس قميص بسيط وساعة فإيديه، وشعره كان مازال فازك او ممرتبش مزيان بحال اللي كان مستعجل.

- صباح الخير.

الأم ابتسمت.

- صباح الخير ولدي، جيتي فالوقت للي غادي يسالي فيه الفطور.

كلس ريان وهو كيشوف فطابلة.

- يعني باقي عندي شويا الحظ

ضحكت ليان.

- لا، غير حيت ماما مسكينة كتستناك ديما.

شافها بنظرة هادئة.

- وانتي؟ ديما كتستناي غير باش تنتاقديني.

رفعت حاجبيها.

- حيت خاصو شي واحد يقول ليك الحقيقة.

هز ريان كتافو.

- الحقيقة ديالك كتوجع أكثر من المرض.

سكت المكان لثانية..... لاحظت ليان أنه قالها بلا ما يقصد.

ولكن بسرعة بدل الموضوع.

شد كأس القهوة.

- واش غادي لشي بلاصة اليوم الوليد ؟

الأب جاوبه:

- اه داير مع واحد سيد اليوم .

هز ريان راسو بالايجاب .

كانت حياتهم عادية...

ضحك.

نقاشات صغيرة.

اهتمام متبادل.

أي شخص يشوفهم يقول بلا تردد:

"هاد العائلة ما ناقصها والو."

ولكن...

ما كان حتى واحد عارف أن هاد الهدوء كان مخبي وراه سر كبير.

بعد الفطور، خرج ريان باش يمشي لخدمتو.

وقبل ما يخرج، وقفت ليان قدام الباب.

- ريان.

التفت ليها.

- نعم؟

بقات ساكتة لحظة.

ومن بعد قالت:

- ما تنساش الدوا ديالك.

تغيرت ملامحو لثانية...... ومن بعد ابتسم.

- ما غاديش ننساه.

هزات راسها.

- مزيان.

خرج ريان.

وبقات ليان كتشوف للباب اللي تسد من وراه.

ما كانتش عارفة...

أن هاد الدوا اللي ولى جزء من حياة ريان من سنين...

كان مرتبط بسر غادي يبدل حياتهم كاملين.

ــــــــــــــــــــــــــــــــــــــــــــــــــــــــــــــــــــــــــــــــــــــــــ

إذا كنتي وصلتي لهنا، فراه بصح شاركْتيني هاد اللحظة ديال هد الفصل، شكراً من القلب.

إلى عجبك الجو وطريقة السرد، خلي ليا رأيك.

فالتعليقات:

شنو حسّيتي فهاد الفصل؟

شكون أكثر شخصية قربات ليك؟

وكفاش كتصورو الأحداث اللي جاية؟

🤔

✨تفاعلكم كيعطيني حماس نكمّل ونصقل الكتابة أكثر، وبصراحة كنكتب وأنا في بالي الناس اللي غيقراوها وكيتخيلُو معايا 🫣✨

🌃ليلة سعيدة بيزو ليكم كاملين 🌙🤍