البارت الرابع والعشرون

- مش قادر أصدق إن إنتِ بجد جنبي دلوقتي، بكلمك كده وبسمع نبرة صوتك وهي طالعة.. أنا حاسس إني أسعد إنسان في الدنيا دي كلها، والمكان مش سايعني من الفرحة.

طأطأت راندا رأسها وابتسمت بخجل شديد تلونت معه وجنتاها بحمرة قانية، أغمضت عينيها للحظات تستجمع شجاعتها، ثم رددت بصوت خافت كاد لا يتجاوز مسمعه

- دي أول مرة في حياتي كلها أعمل حاجة زي دي أو أوافق أكلم حد.. مش عارفة بجد أنا عملت كده إزاي وليه، بس كل اللي عارفاه ومتأكدة منه إني حاسة بإنجذاب غريب ومشدودة ليك، وعشان كده حبيت أديك وأدي نفسي فرصة.

كانت كلماتها الرقيقة بمثابة وقود أشعل نيران الأمل في صدره، فالتمعت عيناه بسعادة طاغية، وتابع بلهفة وعاطفة جياشة صبغت نبرته

- أوعدك، أوعدك من كل قلبي إنك مش هتندمي يوم واحد على الفرصة دي.. أنا أتمنى لو أروح أتقدم لك حالا وأخبط على باب بيتكم النهاردة قبل بكرة، بس.. بس خايف أهلك يرفضوني وميرحبوش بيا

عقدت راندا حاجبيها وضَيّقت ما بينهما بتعجب، وتطلعت إليه بدهشة واستنكار لتردد

- وليه ميرحبوش بيك يا خالد؟ إيه اللي يخليهم يعملوا كده؟

اعتدل خالد في جلسته، ورفع بصره ليتطلع إلى الفراغ أمامه، بينما تسللت نبرة من اليأس والإحباط إلى صوته وهو يردد منكسرًا

- يعني.. أنا لسه في أول الطريق، لا وظيفة ثابتة بمرتب كبير ولا غيره، دا غير كمان وقفتي وشغلي في الكافيتيريا.. تفتكري أهلك هيرضوا بوضع زي ده؟

استدارت راندا بجسدها كاملاً مواجهة إياه، واندفعت الكلمات من بين شفتيها بتلقائية مفرطة نابعة من أعماق قلبها

- وإيه المشكلة في كل ده؟ الشغل مش عيب أبدًا، وبكرة تخلص وتناقش الماجستير وتكبر وتفتح المركز الخاص اللي نفسك فيه وتحلم بيه من زمان.. وكمان متنساش.. إني معاك وجنبك ومش هسيبك.

قالت كلمتها الأخيرة بنبرة خافتة للغاية تذوب خجلاً، وما إن أدركت جرأة ما تفوهت به، حتى انتفضت واقفة على الفور كأنها تهرب من صدى صوتها ومن نظرات عينيه التي اتسعت ذهولاً وعشقاً. استدارت وغادرت المكان بخطوات سريعة لاهثة، تاركة خالداً في مكانه، غارقاً في صمته، يطوف بين سحابات العشق الساحرة، ويرتوي من سماء حب نقي لم يظن يوماً أنه سيناله.

✨✨✨✨✨✨✨

وفي مقلب آخر من الحياة، جاءت اللحظة الحاسمة والمزلزلة.. اللحظة التي تضع فيها نهى مولودها الأول يونس.

كانت دماء الألم تسري في عروقها، لكن آلام المخاض والجسد الممزق لم تكن أبدًا بأقوى أو أشد من تلك الآلام النفسية العنيفة التي كانت تعتصر قلبها من الداخل؛ صراع الذكريات والماضي الذي أبت الأيام أن تمحوه.

وضعت الممرضة الصغير بين يديها، فتطلعت نهى إلى مولودها، إلى تلك الملامح البريئة الغضة، وصوت بكائه الضعيف الخافت الذي كان يعزف بقسوة على أوتار قلبها المجروح ويثير في صدرها شجناً لا يرحم.

اقترب منها حسن وعلامات الفرحة والزهو تكسو وجهه كأب يشهد معجزته الأولى، وسألها بنبرة متهللة مليئة بالسعادة

- مبروك يا حبيبتي، يتربى في عزنا يارب.. هاه، قوليلي بقا، إيه الاسم اللي استقريتي عليه ونسميه للواد؟

نقلت نهى نظراتها الباهتة الشاردة ببطء.. نظرت إلى طفلها القابع في حضنها، ثم رفعت عينيها إلى والده حسن، وتاهت في عالم آخر تماماً وهي تردد بنبرة آلية جافة غلفها الشرود التام

- يونس.. هنسميه يونس.

اتسعت ابتسامة حسن ووافقها الرأي فوراً، بينما انقبضت روح نهى وهي تخوض حواراً سرياً مريراً مع نفسها، محدثة قلبها الباكي

- مش عارفة إيه اللي خلاني أنطق بالاسم ده بالذات وأختاره دلوقتي.. بالرغم من إن ده الإسم اللي كنت متفقة عليه أنا وعماد، الاسم اللي اخترناه سوا وبنينا عليه أحلامنا يوم ما كنا بنرسم بيتنا في الخيال.. أنا مش قادرة أنساه يا ربي، مش قادرة أخرجه من جوه قلبي ولا عارفة أعيش من غير ما يطاردني طيفه في كل خطوة.. حتى في ابن راجل تاني

✨✨✨✨✨✨✨✨

جلست لمار في زاوية الغرفة، تحتضن عروستها القماشية الصغيرة بحنوٍ بالغ، هامسة في أذنها بعبارات متلاحقة وكأنها تتحدث إلى صديقتها المقربة وتشاركها أسرارها الصغيرة. وفي المقابل، كان والدها وليد غارقاً خلف مكتبه الخشبي الضخم، يطالع الأوراق المتراكمة أمامه بتركيز شديد، غارقاً في مراجعة تفاصيل معقدة لإحدى القضايا القانونية الهامة التي تشغل باله.

فجأة، وباندفاع الصغار، نهضت لمار من مكانها تاركةً عروستها، واندفعت بخطوات لاهثة نحو مكتب والدها. وقفت بجوار مقعده الجلدي، ورفعت رأسها تتطلع إليه بملامح طفولية لحوحة وهي تردد

- بابا.. أنا عاوزة أروح ألعب مع زينا عشان خاطري

تنهد وليد بثقل، ونزع نظارة القراءة الطبية عن عينيه بقلة صبر، ثم راح يفرك جفنيه بإجهاد واضح قبل أن يلتفت إليها بنظرة حادة يكسوها الضيق، وقال بنبرة حازمة

- يا لمار.. دي المرة العاشرة اللي تطلبي مني فيها نفس الطلب وأقولك لأ... مش هينفع دلوقتي خالص.. سيبيني بقى ركزي واقعدي ساكتة خليني أخلص الشغل اللي ورايا ده.

انقبضت ملامح لمار، وضربت الأرض بقدمها الصغيرة بعناد طفولي غاضب، ورفعت صوتها وهي تحاول فرض رغبتها

- بس أنا عاوزة ألعب مع زينا.. وكمان أنا عاوزة أقعد مع ماما خلود

وما إن استقر وقع كلمة ماما في مسامع وليد، حتى تبدلت ملامحه بالكامل. أطبق الأوراق القانونية التي بين يديه بقوة أحدثت صوتاً مدوياً في الغرفة، وانتفض واقفاً من مقعده فجأة. انحنى بجسده الطويل وهبط بركبتيه إلى الأرض حتى صار في مستوى طولها الصغير، وتطلع إلى عينيها بدهشة عارمة وصدمة لجمت نبرته ليقول بحذر

- ماما؟ أنتِ مين بالظبط اللي قالك تقولي لها يا ماما يا لمار؟

تراجعت لمار خطوة إلى الوراء، وشعرت بوخزة من الخوف تتسلل إلى قلبها من نبرة صوته الحادة المباغتة، فابتلعت ريقها وردت بتلعثم وارتباك

- أنا.. أنا بحبها أوي يا بابا.. وهي طيبة معايا خالص، وأنا اللي طلبت منها أقولها يا ماما وهي وافقت وحضنتني.

صمتت لمار لثوانٍ، وتحركت أصابعها تلقائياً نحو فمها بدأت تقضم أظافرها بتوتر، وعيناها تدوران في المكان وكأن عقلها الصغير يحاول التوصل إلى قرار مصيري هام والشجاعة تسعفه بالكاد. تقدمت خطوة أخرى نحو والدها المنحني أمامها، ومدت كفها الصغير لتلكزه بخفة ودلال طفولي على كتفه، ثم أردفت ببراءة وعفوية مطلقة

- بابا.. اسمع كلامي واتجوز ماما خلود، عشان تيجي تعيش مع لمار في البيت على طول وما تسيبناش.