Chapter 5

ISANG mahabang buntong hininga ang pinakawalan ni Kenna at sinalubong ang mga mata nito bago tuluyang sumagot. “I’m sorry sir pero hindi ko matatanggap ang offer niyo. Why not try to find another woman? Yung handang makipagkasundo sa inyo.” suhestiyon niya. Ayaw niyang itaya ang puso ng anak niya.

Ayaw niyang umasa ito sa pansamantalang atensyon at pagmamahal na hindi naman totoo. Oo, gusto niyang maging masaya ang anak niya pero nasisiguro niya na kapag napamahal na ito sa lalaki at kailangan na sila nitong iwan ay ang anak niya lang din ang mahihirapan. 

Ngumiti ito sa kaniya at nagkibit balikat. “Bibigyan muna kita ang oras para mag-isip Miss Samonte. Hindi naman ako nag-aapura.” sabi nito sa kaniya.

Bakit ba hindi na lang ito sumuko? Bakit siya pa talaga? Napakarami namang pwede nitong maging asawa lalo na at gwapo naman ito, bukod pa doon ay napakayaman nito kaya tiyak na hindi ito mahihirapang maghanap kung sakaling kailangan talaga nito ng mapapangasawa. Bakit hindi na lang ito magbayad ng babae diba?

Ganun ba iyon kahirap gawin? 

“I will not accept your answer right now.” sabi nitong muli bago pa niya maibuka ang kanyang bibig para muling sumagot.

“You can go now.” 

Wala na siyang nagawa kundi ang tumalikod at lumabas ng opisina ng lalaki. Napahawak siya sa kanyang dibdib pagkasara niya ng pinto at ilang beses na nagpakawala ng malalalim na buntong hininga. Hanggang ngayon ay hindi pa rin siya makapaniwala na muling nag-krus ang landas nila ng lalaki na hindi siya nakilala.

Pero ayos na rin iyon sa kaniya. Wala naman siyang problema doon, pero ang iniisip niya ay ang anak niya. Kaagad niya itong hinanap at nakita niya ito sa playground. “Anak, pwede ba tayong mag-usap?” mahinahon niyang tanong sa kanyang anak. Tumango naman ito kaagad kaya hinila niya ito patungo sa gilid.

Isang mahabang buntong hininga ang pinakawalan niya. Sa totoo lang ay hindi niya alam kung paano niya kakausapin ang anak niya tungkol sa lalaki. Hindi naman niya ito pwedeng pagalitan. “Anak, bakit mo naman ginawa yun? Alam mo ba kung sino ang lalaking iyon? Siya ang may-ari ng hotel na ito.” 

Sa halip ay mas nagliwanag pa ang mga mata ng anak niya. “Talaga Mommy? E di mayaman pala ang Daddy ko?” tanong nito sa kaniya.

“Anak, huwag mo siyang tawaging Daddy. Nakakahiya!” saway niya sa anak niya. “Huwag kang mag-alala, kung gusto mo talaga ng bagong Daddy, sige. Maghahanap ako para syao pero huwag naman yung boss ko okay? Hindi mo siya pwedeng tawaging Daddy anak ng basta-basta okay? Paano kung…” bigla siyang tumigil sa pagsasalita ng bigla na lang itong napalabi.

Nag-umpisang mamula ang mga mata nito. “Pero Mommy, siya ang gusto kong maging Daddy.” nag-umpisa na itong umiyak.

“Anak, anak… listen to me, okay?” pilit niyang pinapatahan ito ngunit mas lalo lang itong umiyak.

“No Mommy! No! Ayaw ko ng iba!” biglang sigaw ng kanyang anak sa kaniya na labis niyang ikinagulat dahil ito ang unang pagkakataon na sinigawan siya nito. 

Ilang sandali pa ay bigla na lang itong tumayo at tumakbo palabas na kaagad niya namang hinabol. “Cassandra! Wait!” sigaw niya rito ngunit nagpatuloy lang ito sa pagtakbo.

“Cassandra!” 

Tumakbo ito patungo sa lobby ng hotel kung saan ay naroon ang lalaki at paalis na. Humabol si Cassandra dito at hinawakan ang kamay nito. “Daddy!” sabi nito sa lalaki.

Tumigil naman sa paglalakad ang lalaki at ibinaba ang cellphone na nasa tenga nito pagkatapos ay lumingon sa kaniya bago ibinalik ang tingin sa anak niya. Kitang-kita niya kung paano ito umupo sa harap ng anak at pinunasan ang pisngi nitong puno ng luha. 

Tumakbo siya palapit dito para kuhanin si Cassandra ngunit nagtago sa likod ng lalaki ang anak niya. “Cassandra! Come here!” 

Hindi natinag ang kanyang anak. Sa halip ay tumingala sa lalaki. “Daddy, pwede po ba akong sumama sa inyo?” nagsusumamong tanong nito.

“Cassandra!” saway niya sa kanyang anak at tumingin sa lalaki. “Sir, I-I am sorry for her behaviour. Hindi na po talaga ito mauulit ipinapangako—”

“Sure.” sagot ng lalaki na para bang hindi nito narinig ang sinabi niya. Tumayo ito at hinawakan ang kamay ni Cassandra bago muling ibinalik ang tingin sa kaniya. “Ihahatid ko na lang siya mamaya sa bahay niyo, just give me your address.” sabi nito at inabot sa kaniya ang cellphone nito.

Hindi siya makapaniwalang napatitig sa kanyang anak at sa lalaki. Paanong napapayag ito ng anak niya ng ganun kadali? O ginagawa nito iyon para siya ang mapapayag nito sa gusto nito? 

Napakuyom ang kanyang mga kamay ngunit sa itsura ng anak niya ay hindi talaga ito sasama sa kaniya kaya wala siyang nagawa kundi ang tanggapin ang cellphone na inaabot nito at i-save ang kanyang number rito bago niya ibinalik sa lalaki ang cellphone.

Bahagya itong ngumiti sa kaniya. “Ako ng bahala sa kaniya, don’t worry.” pagkasabi lang nito iyon ay tumalikod na ito at umalis habang nakahawak sa maliit na kamay ng anak niya  na para bang tunay silang mag-ama.

Naging malamig ang mga mata niya habang sinusundan ng tingin ang mga ito. Paano nangyari ang lahat ng ito?

…