البارت 21

في كلية ندى...

كان عمران يُلقي المحاضرة، وندى جالسة تدوّن الملاحظات باهتمام. وبعد أن انتهت المحاضرة، قال بابتسامة:

عمران: خلصت محاضرة النهارده، وأي حد عنده سؤال يكتبه في ورقة ويحطه على المكتب هنا في المحاضرة الجاية، وأنا هجاوب عليه.

وسكت لثوانٍ ثم قال:

عمران: الطالبة ندى أمين.

ندى انتفضت في مكانها وكتمت أنفاسها فور سماع اسمها، بينما شعر هو بتوترها فكتم ضحكته.

عمران: تيجي لمكتبي بعد المحاضرة.

قال كلمته وغادر القاعة، بينما ظلت ندى جالسة مكانها لا تتحرك. خرج جميع الطلاب وبقيت وحدها لبعض الوقت، ثم نهضت وتوجهت إلى مكتبه. وقفت أمام الباب مترددة، لا تعرف هل تطرق أم ترحل.

في الداخل كان عمران يتحرك ذهابًا وإيابًا وهو يسأل نفسه:

ـ يا ترى هتيجي؟

وبعد قليل شعر بوجود شخص يقف خلف الباب، فتوقف منتظرًا أن تطرق. ولما تأخرت، شعر بالقلق واتجه نحو الباب وفتحه بسرعة، فوجدها أمامه مباشرة.

انتفضت ندى من الخضة وكادت ترحل.

عمران بسرعة: آنسة ندى.

ندى بارتباك: أفندم يا دكتور... حضرتك عاوزني؟

عمران بابتسامة: اتفضلي المكتب عشان نتكلم.

دخل وتركها خلفه. ترددت قليلًا ثم دخلت، لكنها أبقت الباب مفتوحًا.

ندى وهي واقفة بارتباك: خير يا دكتور؟

عمران بابتسامة: اتفضلي اقعدي.

نظرت إلى الكرسي الذي أشار إليه وجلست على طرفه بتوتر.

شعر عمران بارتباكها فقال:

عمران: أنا قبل ما أديكم محاضرات سمعت عنك من الدكاترة. الكل بيشكر فيكي وفي الأبحاث اللي بتعمليها، وكلهم متوقعين إنك هتكوني الأولى على دفعتك. ولما دخلت لكم محاضرات وشوفت مناقشتك وأسئلتك، اتأكدت إن رأيهم في محله، وإنك فعلًا تستحقي التقدير.

ندى بابتسامة خجولة: متشكرة لحضرتك.

عمران: أنا بعتلك عشان أقولك إن الجامعات على مستوى مصر السنة دي عاملة مشروع جديد... مسابقة بين الطلاب المتميزين.

انتبهت ندى لكلامه، واختفى جزء كبير من ارتباكها، فابتسم هو لأنه نجح في كسر الحاجز بينهما.

عمران: المسابقة هتجمع الطلاب المشاركين من كل الجامعات، وكل جامعة هتقدم مشروع أو أكتر باسم الطلبة اللي هيشاركوا. والطالب اللي هيكسب هيحصل على الكورسات اللي يختارها في الجامعة الأمريكية مجانًا. المسابقة مش للطلبة بس، دي للدكاترة كمان. كل دكتور هيشارك هيكون مشرف على طالب ينفذ المشروع.

ثم تابع:

ـ أنا لما سألت في الجامعة عن الطلبة المتميزين، لأني لسه راجع من لندن من كام شهر ولسه معرفش الطلبة كويس، قالوا لي أسماء كتير، لكن الكل أجمع عليكي إنتِ.

ونظر إليها مبتسمًا.

ـ أنا لما جيت لكِ في الكافتيريا كنت جاي أسألك لو حابة تشتركي وتكوني تحت إشرافي.

ندى بخجل شديد: أنا آسفة يا دكتور... أنا ماكنتش أعرف حضرتك وافتكرتك...

وسكتت محرجة.

عمران مبتسمًا: افتكرتيني بعاكسك؟

ازداد خجلها أكثر.

عمران: عمومًا، أنا أتمنى إنك توافقي تدخلي المسابقة تحت إشرافي.

ندى: أنا مبسوطة إن حضرتك اخترتني، بس خايفة ماكنش قد المسابقة وتخسر بسببي. حضرتك بتقول كل الجامعات على مستوى مصر، وأكيد فيه طلاب كتير هيشتركوا.

عمران بابتسامة مطمئنة: ندى... هدفي مش المكسب وبس. المشروع مش هيكون صعب زي ما إنتِ متخيلة. هيكون عمل فني؛ حائط في شارع، وجناح في مستشفى أطفال هنجهز حيطانه، ومدرسة هنرسم عليها. الهدف من اشتراكي إني أغير ولو جزء بسيط من المنظر حوالين الأطفال. لكن طبعًا لو كسبنا هكون مبسوط.

ندى مبتسمة: وأنا موافقة يا دكتور. أنا كمان نفسي كل الأماكن اللي فيها أطفال تكون جميلة، لأن ده هيفرق في تكوين شخصيتهم.

عمران بفرحة: يبقى اتفقنا.

فتح ملفًا أمامه وأخرج ورقة.

ـ دي استمارة الاشتراك. امليها ببياناتك، وأنا كاتب بياناتي تحت كمشرف.

ابتسمت ندى وأخذت الورقة والقلم، وأثناء ملء الاستمارة رن هاتفها.

ندى بخجل: ممكن أرد على أختي؟

عمران: أكيد طبعًا، اتفضلي.

ابتعدت قليلًا وأجابت:

ندى: ألو... أيوة يا أميرة، وصلتي؟

أميرة بضيق: لا لسه في المستشفى. عندي شغل بعد ما كنت خلصت. جه واحد زي التور وقع قهوة علي الورق، فهعيدوا كله من تاني.

ضحكت ندى فور سماعها، وكان عمران يتابعها بعينيه، وما إن ضحكت حتى ابتسم دون وعي.

أميرة بغيظ: بتضحكي على إيه إنتِ كمان؟ لما تخلصي فوتي عليّا انتي، أكون خلصت جزء منهم ونروح سوا... أوكي؟ هستناكي، باي.

أغلقت الخط، وما إن استدارت حتى وجدت أليف واقفًا أمامها ينظر إليها بغيظ.

أميرة بفزع: يا ماما! يخرب بيتك، إنت بتطلع منين؟

أليف بغيظ: دي تالت مرة تشتميني وأنا لحد دلوقتي ساكت. بس والله لعلمك الأدب ولسانك ده محدش هيقطعه غيري.

أميرة بغيظ: لسان مين ده اللي هتقطعه يا تور إنت؟

قبض على يده واقترب منها، فتراجعت بسرعة ووضعت يدها على وجهها بخوف.

ابتسم عندما رأى رد فعلها.

أليف: ما إنتِ جبانة أهو وبتخافي... أمال عاملة فيها بلطجية ليه؟

أميرة متصنعة القوة: أخاف من مين؟ منك إنت؟ ده لا إنت ولا عشرة زيك.

واقتربت منه بغيظ.

ـ ولو حد محتاج يتعلم الأدب يبقى إنت، وهيكون على إيدي.

أليف بابتسامة متحدية: هنشوف... هنشوف.

اقترب خطوة أخرى فتراجعت بخوف تحاول إخفاءه.

ـ أنا هربيكي.

ثم أعطاها ظهره، فظنت أنه سيرحل، لكنه استدار فجأة ورفع يده كأنه سيضربها.

صرخت وأغمضت عينيها بخوف.

أليف ضاحكًا: شششش... متخافيش، ده أنا بنش الدبان. المستشفى مليانة دبان... ابقي رشي.

وغادر وهو يضحك، بينما ظلت هي تضرب الأرض بقدمها من الغيظ.

أميرة: حيوان ومتخلف وتور... هنشوف مين هيربي التاني يا زفت.

...

عند ندى، كانت قد أنهت المكالمة وعادت لتجلس أمام عمران وتكمل الاستمارة.

وبعد أن انتهت:

ندى: اتفضل... بس هو ميعاد المسابقة إمتى؟

عمران: بعد الامتحانات، في إجازة نصف السنة إن شاء الله. هبقى أبلغك بالميعاد والأماكن اللي هنشتغل فيها. المهم إنك تبدئي تجهزي كام فكرة عشان ننفذها.

ندى وهي تقف: حاضر. هبدأ أجهز وأوريها لحضرتك تقول رأيك وملاحظاتك. ومتشكرة لثقتك يا دكتور، ويارب أكون قدها.

وقف عمران أمامها ونظر إليها بنظرات أربكتها، بينما كان يشعر بإحساس لا يستطيع تفسيره.

عمران: أنا اللي متشكر إنك وافقتي إني أكون مشرف عليكي في المشروع.

ندى بخجل: العفو... عن إذنك.

وغادرت بسرعة، بينما ظل يتابعها بعينيه حتى اختفت عن ناظريه.

ثم عاد إلى مكتبه، فوجد هاتفها فوق المكتب.

أمسكه وخرج بسرعة ليلحق بها، لكنه لم يجدها.

عاد إلى مكتبه ووضع الهاتف أمامه وظل ينظر إليه.

عمران لنفسه: لا... ماينفعش أفتحه، دي خصوصيات. بس لازم أتصل بأختها وأقول لها إن ندى نسيت الموبايل. أحسن تفتكره ضاع.

توقف لحظة ثم قال:

ـ بس ممكن يكون عليه باسورد... طب ما أجرب.

أمسك الهاتف وفتحه.

عمران بفرحة: مفيش باسورد!

ظهرت أمامه صورة تجمع ندى وأميرة وحكمت وفاطمة.

عمران مبتسمًا: ضحكتك حلوة أوي يا ندى... بس ليه لبسه طرحة في البيت؟ يا ترى مين اللي معاكي دول؟ أكيد أخواتك ومامتك...

ثم تنبه لنفسه فجأة.

ـ أنا إيه اللي بعمله ده؟ ماينفعش أتفرج على صورها. أنا فتحته عشان أكلم أختها وبس.

فتح سجل المكالمات واتصل بآخر رقم باسم أميرة.

أميرة: أيوة يا نودي، وصلتي؟

عمران: السلام عليكم. أنا دكتور عمران، معيد في كلية الآنسة ندى.

أميرة بخضة: فين ندى؟ حصل لها حاجة؟

عمران: لا لا، اطمني. هي بس نسيت موبايلها في مكتبي بعد ما كلمتك. فقلت أكلمك عشان تعرفيها إنه معايا. وأنا موجود في الجامعة لحد الساعة خمسة لو حبت تيجي تاخده.

أميرة براحة: الحمد لله... متشكرة جدًا يا دكتور. هبلغها.

...

وبعد قليل، كانت أميرة تنتظر ندى أمام المستشفى.

وجدتها تفتش في حقيبتها بتوتر.

أميرة: ريحي نفسك... مش هتلاقيه.

ندى: كويس إنك خرجتي... انا مش لقيه الفاون عشان اتصل بيكي.

ثم انتبهت لكلامها.

ـ انتي عرفتي منين إني مش لاقياه؟

أميرة بابتسامة: لأن حضرتك نسيتيه في مكتب دكتور عمران.

ثم غمزت لها.

ـ مش ده برضه الدكتور اللي بيبصلك بصات غريبة؟

ندى بابتسامة شاردة: أيوة هو... بس إنتِ عرفتي منين إنه عنده؟

أميرة: هو اللي اتصل بيا. الظاهر إنك وحشتِيه.

ندى: أميرة!

أميرة ضاحكة: خلاص متتعصببيش هو بيقول لكِ الفوت معاه وانه موجود لحد الساعة خمسة في الكلية لو عايزة تاخدي الموبايل... هييييه، شكله وقع ولا حد سمى عليه.

ندى قرصتها في كتفها: اتلمي وامشي قدامي.

...