الحلقة الاولى

كانت واقفة في المطار مستنية عربية الإسعاف والدكاترة علشان ينقلوا بنتها الوحيدة لقصر والدها.

الدكتور: "اتفضلي حضرتك، وإحنا جايين وراكي."

ريهام: "لأ، أنا مش هسيبها لوحدها، أنا هكون معاها."

الدكتور بهزة دماغ: "تحت أمرك، اتفضلي."

اتجهوا كلهم لقصر والدها، القصر الضخم ده. كانت بتبص للقصر وعينيها مليانة دموع وهي بتفتكر كل لحظة عاشتها هنا بسعادة، لحد ما راحت لجحيمها برجليها.

وهي دلوقتي واقفة قدام القصر ودموعها لسه على خدها، بتبص للي واقف قدامها وبيبادلها النظرة بشوق، بس شموخه منعه يظهر الشعور ده، الشعور اللي مخليه عاوز يروحلها ويحضنها.

كان بيبصلها بس بعد نظره عنها لما نزل اتنين ممرضين من عربية الإسعاف، شايلين الطفلة اللي نايمة بسلام، مش حاسة بأي حد حواليها. بص لمساعده المخلص "منيب" اللي هز له دماغه واتجه معاهم للأوضة اللي حضرها مخصوص لحفيدته الوحيدة.

دخل هو وهي ماشية وراه. وبعد ما الدكاترة مشوا وسابوا ممرضتين للاعتناء بالصغيرة -مين اللي يقدر يرفض أوامر شخصية مهمة زيه؟-

شريف ببرود: "بقالك قد إيه بعيدة عن البيت ده؟"

ريهام كانت بتبص للأرض وبتبكي: "سامحني، أنا آسفة. حضرتك كنت صح، أنا كان لازم أسمع كلامك، عصياني وصلني لهنا، أنا معترفة بغلطي."

شريف: "إيه اللي حصل؟"

بصتله وكانت لسه هتتكلم، بس قطع كلامها حضور والدتها وهي بتجري وبتحضنها ببكاء وحب وعذاب دام 18 سنة.

منال والدتها: "ريهام بنتي حبيبتي!" وقعدت تبوس كل حتة في وشها بحب، وريهام بتبادلها الضمة والبكاء مش راضي يقف بينهم.

منال بمعاتبة: "كل ده غياب؟ إيه.. هنت عليكي؟ إخص عليكي، هان عليكي بعدك عن حضن أمك يا نور عيني؟"

ريهام ببكاء: "كنت خايفة أرجع متقبلونيش، كلمة بابا كانت بترن في وداني طول الوقت."

بصتله وقالت بوجع:

("إن طلعتي من البيت ده مش هترجعي تاني، وهتنسي تماماً إن ليكي أهل؛ لأنك هتكوني موتي بالنسبة لنا كلنا، ومحدش فينا هيتواصل معاكي بعد كدة."

كان بينظر لأسرته المكونة من زوجته "منال" وابنته الأصغر من ريهام "أنهار".

)

شريف: "عاوز أسمع كل حاجة، من البداية لحد دلوقتي."

هزت دماغها وبدأت تحكي اللي حصل في رحلتها المؤلمة:

"بعد ما طلعت من القصر، روحت مع جاك على المطار. كنت زعلانة إني بعدت عن أهلي، بس كنت مقتنعة إن حبي هيكون سند ليا. كانت حياتي كويسة سنة واتنين وتلاتة.. بعد 4 سنين جواز ربنا بعتلي أميرة، أميرتي الصغيرة. كنت فرحانة أوي، أخيراً هكون أم، وكنت فاكرة إن جاك هيفرح زيي، بس حصل العكس. لما قولتله إني حامل اتعصب وكسر نص البيت، وأمرني أنزل الطفل. ولما رفضت، بقى بيضربني كل يوم وبقى بيخوني من ورايا وحتى قدامي ولا كأني مراته. أنا اتحملت وقلت هيعقل لما الطفل ييجي، بس حصل العكس؛ كان على طول بيحاول يتخلص من أميرة بأي شكل. أنا كنت ببعده عنها لحد ما تمت الـ 4 سنين وهو على نفس الحال، بس طلعت في دماغه يبيعها لتاجر من اللي بيشتروا الأطفال ويبيعوهم لناس مش بتخلف. أنا مقدرتش أتحمل، خدتها وهربت بيها على فرنسا وربيتها. كانت بتكبر قدام عيني وأنا مبسوطة إنها معايا بأمان لحد ما تمت 14 سنة. كانت في المدرسة وأنا كنت في الشغل، واتصلوا بيا وبلغوني أسوأ خبر في حياتي؛ أميرة عملت حادثة. روحت بسرعة للمستشفى وأنا بدعي لربنا يحميهالي، ولما وصلت ليها كان حواليها 5 دكاترة.

سألت الدكتور عن حالتها، وقال لي إنهم مستغربين من حالتها؛ الحادثة مش هي سبب إنها مش بتفوق، لأنها أغمى عليها على طول ومافيش أي خدش في جسمها، بس عقلها مش قادر يقبل إنه يفتح عينيه ويرجع للواقع، وإنها عايشة بس مش جسدياً.. الجسد هامد والعقل هو اللي شغال. قال لي إنها ممكن تكون سمعاني وبس، مش قادرة تحس بنفسها، ومعندهاش القدرة إنها تسيطر على نفسها. سألتهم وده هيستمر لحد إمتى؟ رد عليا وقال لي: 'معنديش أي علم، الحالات دي بتكون نادرة ونسبة علاجها قليلة، ونسبة الشفاء مش محددة'. ومن وقتها وأنا بحاول بكل قوتي أعمل حاجة، بس مفيش أمل. بنتي قدامي ومش قادرة أساعدها.. فشلت حتى في إني أحميها."

كانوا بيسمعوا لها بإنصات؛ منال بتبكي على اللي حصل لبنتها، وشريف بيضغط على إيده بقوة من الغضب.

شريف: "اطلعي ارتاحي، وبعد كدة هنتكلم."

هزت له دماغها وطلعت لفوق بصمت.

منال: "أبوس إيدك براحة عليها، إنت شايف حالتها، كفاية اللي هي فيه، أرجوك."

بص لها بصمت، وبعدين مشي بعد ما نادى على مساعده "منيب" عشان يحصله.

منال: "يارب ريح قلب بنتي، وقوّملها بنتها بالسلامة."

♡………®………♡

بينما في قسم الشرطة، كانت شغالة على واحدة من القضايا المهمة، لحد ما دخل عليها صديقها المقرب "محمد".

محمد: "إيه يا سيادة الرائد، أخبارك إيه؟"

بصتله وبعدين رجعت بصت للملف اللي في إيدها: "كويسة، طمني لقيت أي معلومة جديدة؟"

محمد طلع ورقة فيها كل اللي محتاجينه:

الاسم: ماركين.

السن: 45 سنة.

عضو أساسي في واحدة من عصابات المافيا، وحالياً هو على وشك إنه ييجي مصر لأن عنده مهمة لازم يخلصها هنا، بس أكيد إحنا مش هنسمحله، ولا إيه يا سيادة الرائد "أنهار"؟

أنهار بنظرة حاقدة: "مش هسيبه، مش هنسى إنه هو السبب في موت 'نهال' صاحبتي.. كل ذنبها إنها كانت بتقوم بشغلها وبس."

محمد بحزن: "معاكي حق، الرائد نهال الله يرحمها كانت مخلصة لشغلها جداً."

رن تليفون أنهار، راحت تمسكه واستغربت لما لقت إن اللي بيتصل هو والدها؛ لأنه عمره ما كلمها أبداً في أوقات الشغل الرسمية قبل كدة.

أنهار: "ألو؟"

شريف بجدية: "نص ساعة وتكوني في المكتب عندي."

قال كلمته وقفل السكة من غير ما يسمع الرد.

محمد: "في إيه؟"

أخدت الجاكيت بتاعها وكانت في طريقها للخارج: "مش عارفة، بس قالي تعالي على مكتبي حالاً."

محمد: "طيب ابقي طمنيني لما توصلي."

أنهار: "أه تمام."

♡………®………♡

بينما في قصر "الزاهي"، كانت قاعدة جنب بنتها وبتبصلها بألم، وعلى الرغم من تعبها في البحث عن علاج لطفلتها، إلا إنها عندها أمل إن ربنا هيساعدها وهيرجعلها طفلتها في يوم من الأيام.

كانت بتبكي وحاطة إيدها على رأس بنتها الصغيرة اللي اتحرمت من ابتسامتها لخمس سنين، وكانت بتعتقد إن ربنا بيعاقبها عشان مسمعتش كلام والدها.

دخلت "منال" لعندها وهي شايلة في إيدها كوباية عصير، كانت جيباها لها عشان تهدي نفسها شوية.

منال بحزن وهي بتبص لبنتها وللطفلة اللي شبه الملائكة، اللي نايمة على السرير من غير حركة، وشبابها بيضيع قدام عيون أمها، قربت منها وحطت إيدها على رأسها وهي بتتأمل الصغيرة.

بصتلها ريهام بألم وبعدين رجعت بصت لبنتها: "أنا تعبت من شوفتها كدة قدامي، ومش عارفة أعملها حاجة، إيدي متقيدة."

منال بألم على حالة بنتها: "ربنا كبير، وإن شاء الله هتصحى وترجع تعيش حياتها أحسن من الأول."

ريهام ببكاء: "مش بتمنى من ربنا غير إنها ترجعلي تاني، أقدر أحضنها وأشوف ابتسامتها الجميلة وجنانها اللي كانت مالية عليا حياتي بيه."

منال حضنتها بحب شديد، وفضلت ريهام تبكي بحرقة جوة حضن أمها اللي ياما تمنته طول السنين الطويلة دي.

♡………®………♡