الفصل ٤

اقترب يوسف من حنين الفاقدة للوعي، ولمس جسدها كالمغيب، ثم انقض عليها كالوحش الكاسر الذي اصطاد فريسته، ممزقاً ملابسها ليفترسها ويعتدي عليها بشكل شنيع. ولم يستفق إلى وعيه إلا حين رآها تنزف أمامه؛ فابتعد يترنح بشدة حتى اصطدم بأحد الحوائط، ثم تركها غارقة في دمائها، وارتدى ملابسه وغادر ليشتري خط هاتف جديد بقلب بارد كحيوان مفترس نهش فريسته ورحل.

في تلك الأثناء بمنزل عبد الرحمن، بدأ القلق ينهش صدره، فالتفت إلى زوجته منى قائلاً بحنق:

— شايفه بنتك اللي قولتلها متتأخريش؟ الساعة داخله على ١٢ ولسه مرجعتش وقافلة التليفون! شوفي عندك أرقام حد من أصحابها نتصل بيهم.

حاولت منى طمأنته برعب مكتوم:

— يا عبد الرحمن متقلقش زمانها راجعة، يمكن تليفونها فصل شحن، استنى أنا معايا رقم شهد هروح اتصل بيها ونطمن.. استرها يارب.

بحثت منى في هاتفها حتى عثرت على الرقم وأجرت الاتصال بصوت ينتفض خوفاً:

— ألو شهد؟ أنا طنط منى والدة حنين، كل سنة وانتي طيبة يا حبيبتي.

أجابتها شهد على الجانب الآخر:

— وحضرتك طيبة يا طنط، بس هي ليه حنين مجتش؟ رغم أنها كانت مأكدة عليا الصبح، أنا زعلانة منها أوي كل أصحابنا هنا إلا هيا!

تجمدت الدماء في عروق منى وسألت بفزع:

— إيه بتقولي إيه يا شهد؟! حنين مجتش عندك لحد دلوقت؟ ازاي؟

أكدت شهد عدم وصولها، فأغلقت منى الهاتف وتوجهت نحو زوجها تفرك أصابعها برعب:

— الحقني يا عبد الرحمن! شهد قالتلي إن حنين مراحتش العيد ميلاد لحد دلوقت!

انتفض عبد الرحمن بفزع:

— انتي بتقولي إيه؟! أنا هتصل على أدهم، أنا شوفتهم وهما ماشيين مع بعض في العربية، أكيد هيكون عارف هيا نزلت فين.

اتصل عبد الرحمن هاتفياً بأدهم على الفور مستفسراً بجنون:

— ألو، أيوه يا أدهم يا ولدي، أنت وصلت حنين صوح؟ آني شوفتها بتركب العربية معاك؟

أجابه أدهم وقلق مفاجئ يجتاح صدره:

— إيوه يا عمي وصلتها ومشيت، ليه في حاجة حصلت ولا إيه؟ قولي يا عمي في إيه؟

هتف عبد الرحمن بانهيار:

— الحقني يا ولدي، بت عمك مرجعتش لحد دلوقت وزميلتها بتقول إنها موصلتش عندها من أساسه!

انتفض أدهم في مقعده وصرخ:

— أنت بتقول إيه يا عمي؟! آني وصلتها بنفسي لحد باب البيت! طيب يا عمي آني راجع، قدامي نص ساعة وأكون عندك، متقلقش خير بإذن الله.

أنهى أدهم المكالمة والتفت إلى سائقه هادراً بلهجة آمرة قاطعة:

— لف وارجع بسرعة يا عبده.. طيارة! سامع يعني إيه طيارة ولا آجي أسوق آني بدالك؟!

أجابه عبده برعب:

— لا فاهم يا بيه.

وفي قنا، كانت جميلة في زيارة لفيلا عبد الكريم، تجلس برأس مشدود لأعلى وتفاخر معتاد وهي تتناول حبات العنب بتلذذ. استشاطت فضة غضباً من برودها فقررت مضايقتها:

— إيه يا جميلة أنتي تبيتي معانا النهارده ولا إيه؟ قوليلي لجل ما نجهزولك أوضة تنامي فيها.

أجابتها جميلة باستفزاز:

— لاه، ماهبيتش عندكم ولا شي، كل الحكاية إني مستنظرة أدهم واد عمي أما يرجع، هسلم عليه وهعاود لبيتنا.. وبعدين مَالِك شيلاني على راسك إياك؟ آني قاعدة في دار عمي.

ردت فضة بسخرية واضحة:

— هااااه قولتيلي، أدهم! هو أنتي متعرفيش إن أدهم النهارده في مصر عند عمي عبد الرحمن وبت عمه القمر حنين؟ فمتتعشميش فيه عشان باله مشغول بالمصراوية، بدال ما تتكفي على وشك من الخضة! وبعدين عامر أهه موجود وهو ابن عمك برضوك.

رفعت جميلة حاجبها بحنق:

— لاه.. أدهم ماهيتجوزش غيري، ماهيتجوزش بنت البنادر اللي بتلبس المحزق والملزق وطالقة شعرها على كتفها.

لم تعرها فضة اهتماماً وتحركت لترد على نداء والدتها غنية التي قالت بقلق:

— يا بتي اتصلي على خيك أتأخر أوي، مش متعود يتأخر أكده في مصر.

طمأنتها فضة وهي تمسك هاتفها:

— حاضر يامه، هتصل بيه دلوقت واطمنك.. أدهم راجل متقلقيش عليه.

وفي تلك اللحظة، رن هاتف فضة وكان المتصل زوجها منصور، فأجابت مسرعة بابتسامة:

— ألو، منصور فينك كل ديه؟ اتوحشتك، أتأخرت ليه أكده أنت كمان النهارده؟

سألها منصور:

— مين كمان اتأخر النهارده غيري يا ست الحسن والجمال؟

ضحكت فضة:

— أدهم أتأخر في مصر هو كمان، ولا اتصل علينا والحاجة هتجن عليه.

أجابها منصور:

— لاه متتصليش عليه وتقلقيه، طمنيها هو راجع بكره عشان الراجل اللي راح يقابله حصلت عنده ظروف وأجل المعاد لبكره.. ياله سلام، نص ساعة وراجع.

قالت فضة:

— ماشي يا واد عمي، هروح أبلغها وأنت متتأخرش.. سلام.

ظنت فضة أن اتصال منصور يحمل الطمأنينة، دون أن تدري أن كذبة تأجيل موعد أدهم ليست إلا غطاءً لعاصفة دموية بدأت تشتعل في القاهرة، وستصل شظاياها قريباً لتزلزل الصعيد بأكمله!

أنهت فضة الاتصال وبصوت مرتفع تحدثت:

— يامه أدهم راجع بكره بإذن الله متقلقيش، الراجل أجل المقابلة لبكره عشان عنده ظروف، هو اتصل بمنصور وقاله وكان في دار عمه عبد الرحمن.

سمعت جميلة حديثها فاستشاطت غضباً، وزفرت بشدة قائلة:

— وأكيد هيبات عند المحروسة بت عمه اللي ما تتسمى!

قالت غنية بوهن:

— طيب يا بتي خير بإذن الله ربنا ييسرله الحال، آني طالعة أنام، الحمد لله اطمنت على خيك.

وفي تلك اللحظة، دخل عامر -الأخ الأصغر لأدهم بثلاث سنوات، المتميز بعصبيته وتهوره وإشرافه على عمال الأراضي ورواتبهم بجانب هويته في ركوب الخيل- وما إن لمح جميلة حتى تسارعت دقات قلبه عشقاً، فهتف بحب:

— إيه ديه! أتاري الفيلا منورة بزيادة النهارده، القمر عندينا! يا أهلاً يا أهلاً منورة يا بت عمي، واقفة ليه ما تقعدي؟

ضحكت فضة باستهزاء:

— قااامر! قمر بالستر يا خوي، ده أنت اللي قمر يا ضي عيون أختك، بس هقول إيه عيونك اللي شايفاها قمر، يالا الله ينورهملك يا خوي. ثم تركتهم وصعدت لغرفتها تنتظر منصور.

بدأ عامر حديثه قائلاً:

— ازيك يا جميلة؟

ردت بعدم اهتمام:

— بخير الحمد لله، آني همشي بقى كفاية أكده، الوقت أتأخر.

تنهد عامر:

— طيب بشوقك يا بت عمي، يالا تعالي آني هوصلك.

جميلة بحنق:

— لاه خليك متتعبش نفسك، أنت لساتك راجع من الشغل تلاقيك تعبان، آني همشي لحالي.

قال عامر بعصبية:

— جرى إيه يا بت عمي؟ الوقت اتأخر، ولو معيزانيش أوصلك هقول لحد من الغفر يوصلك، إنما مترجعيش لوحدك دلوك!

شعرت بغضبه فحاولت التصحيح:

— آ.. آ.. آني مقصدش يا واد عمي، طيب ماشي ياله بينا. وخرجا معاً نحو فيلا عبد المجيد.

وفي القاهرة، وصل أدهم لبيت عمه وصعد المصعد يلهث، وطرق الباب صامحاً:

— هاه يا عمي، في أخبار جديدة؟ رجعت ولا لاه؟

عبد الرحمن:

— لاه يا ولدي مفيش، مرجعتش لحد دلوقت، تعال وصلني المكان اللي وصلتها فيه نسألوا عليها يمكن حد شافها.

أدهم:

— إيوه يالا يا عمي، تعال...

توجهوا معاً نحو المكان وسألوا البواب، وبعد محاولات تذكرها قائلاً:

— اااه في بنت كانت واقفة هنا وجالها واحد بعربية ومشيت معاه.. عربية ألينترا سودة، بس مشوفتش الرقم ولا الشاب اللي جواها.

خرجت النار من عيني أدهم، ودارت في رأسه أسئلة كادت تفجره: كيف لحبيبته أن تركب مع غريب؟! عادوا للسيارة وساد الصمت، والعين لا تتوقف عن البحث. وبعد فترة، سأل أدهم بكبح لجماح نفسه:

— الحل إيه دلوقت يا عمي؟

اختنق الكلام بين شفتي عبد الرحمن وبصوت ضعيف قال:

— مش عارف يا ولدي، دماغي وقفت، حاسس لأول مرة إني عاجز عن الحركة.