الفصل الرابع

التفتت إليها رقية وضاقت عيناها قليلًا.

— كوثر؟ في حاجة؟

اقتربت الأخرى وقالت بوجه متجهم:

— أيوة... في. أنا عاوزة أتكلم معاكي.

تنهدت رقية بعدم ارتياح.

— اتفضلي.

قالت كوثر دون أي مقدمات:

— إنتِ ناوية تقعدي هنا؟

رفعت رقية حاجبها متصنعة عدم الفهم.

— مش فاهمة.

ابتسمت كوثر بسخرية وقالت:

— لا... إنتِ فاهمة كويس أنا أقصد إيه.

ثم أضافت بحدة:

— أنا من حقي أحافظ على بيتي وعلى جوزي.

تجمدت ملامح رقية للحظة.

ثم قالت ببرود:

— بيتك وجوزك؟

وأنا جيت جنب بيتك وجوزك في إيه؟

نفد صبر كوثر فقالت:

— بلاش لف ودوران.

وجودك هنا مش مرحب بيه.

وياريت ما تكونيش سبب في خراب بيتي.

ضحكت رقية ضحكة قصيرة خالية من المرح.

ضحكة خرجت محملة بسنوات طويلة من القهر والخذلان.

ثم قالت بهدوء مؤلم:

— بيتك وجوزك دول كانوا من حقي أنا...

ولا نسيتي إنتِ اتجوزتي إبراهيم إزاي؟

ولا نسيتي إنتِ ووالدتك عملتوا إيه؟

قلبت كوثر عينيها بتأفف.

— أوف بقى يا رقية.

حقي ومش حقي إيه؟

أنا اتجوزته وخلفت منه.

وإنتِ كمان اتجوزتي وخلفتي.

وخلص الموضوع.

أنا مش هسمح لأي حد يخرب حياتي.

نظرت إليها رقية مطولًا.

ثم قالت بنبرة تحمل الكثير من المعاني:

— وعلى كده بقى...

إنتِ سعيدة بالإنجاز العظيم ده؟

ولا إبراهيم هو السعيد؟

عقدت كوثر حاجبيها بعدم فهم.

أما رقية فشبكت ذراعيها أمام صدرها وقالت بلامبالاة:

— المهم...

إيه المطلوب مني عشان بيتك ما يتخربش؟

رفعت كوثر رأسها وقالت بوضوح:

— المطلوب إنك تاخدي بنتك وتمشوا من البيت ده فورًا.

ثم اقتربت أكثر وأضافت بتهديد صريح:

— وإلا الكلام كله هيبقى على المكشوف... قدام بنتك.

أنزلت رقية ذراعيها ونظرت إليها بثبات.

ثم قالت بتحدٍ واضح:

— أنا همشي فعلًا...

بس مش عشان تهديدك الساذج ده.

أنا همشي بمزاجي.

وساعتها ابقي شغلي دماغك إزاي تكسبي جوزك وتحافظي عليه...

بدل ما تشغليها طول الوقت في أذية الناس.

ثم أشارت إلى الباب وهي تنظر إليها باحتقار واضح:

— واتفضلي اطلعي بره.

أنا عاوزة أغير هدومي.

اتسعت عينا كوثر من الصدمة والغضب.

وقالت بصوت مرتفع:

— إنتِ بتطروديني من بيتي يا رقية؟

نظرت إليها رقية لثوانٍ طويلة دون أن تجيب.

كانت عيناها هادئتين بصورة أثارت غضب كوثر أكثر من أي صراخ أو انفعال.

ثم ابتسمت ابتسامة باهتة وقالت:

— بيتك؟

وسكتت لحظة قبل أن تضيف:

— غريبة... أول مرة أعرف إن البيوت بتتبني على وجع غيرها وبتبقى ملك أصحابها.

احمر وجه كوثر من الغضب وقالت بحدة:

— قصدي إيه بالكلام ده؟

اقتربت رقية منها خطوة واحدة فقط.

— قصدي إنك عارفة كويس أوي أنا أقصد إيه.

أنا مش جاية أنازعك في جوزك ولا في بيتك.

ولا حتى فارق معايا كل اللي إنتِ خايفة عليه.

لكن واضح إن ضميرك لسه فاكرك بكل حاجة حصلت زمان.

تشنج فك كوثر وهي تقول بعصبية:

— أنا ضميري مرتاح.

ضحكت رقية بسخرية.

— لا... لو كان مرتاح ماكنتيش طلعتي ورايا لحد أوضتي أول ما وصلت.

وماكنتيش واقفة قدامي دلوقتي مرعوبة بالشكل ده.

صاحت كوثر:

— أنا مش مرعوبة من حد!

— لا... إنتِ مرعوبة.

مرعوبة لا إبراهيم يفتكر.

ومرعوبة لا الحقيقة تظهر.

ومرعوبة لا بنتي تعرف مين السبب الحقيقي في اللي حصل زمان.

ارتبكت كوثر للحظة، لكنها سرعان ما تماسكت وقالت:

— خلي بالك من كلامك.

رفعت رقية حاجبها وقالت بهدوء:

— وإلا إيه؟

هتعملي فيا إيه أكتر من اللي اتعمل؟

خدتي الراجل اللي كنت بحبه.

وشوّهتوا صورتي.

وخلتوني أسيب بلدي وأعيش سنين طويلة بعيد عن أهلي.

فاضل إيه تاني؟

ساد الصمت لثوانٍ.

ثم قالت كوثر من بين أسنانها:

— إبراهيم اختارني أنا.

هنا تغيرت نظرات رقية قليلًا.

وظهر الألم الذي حاولت إخفاءه طوال الحديث.

لكنها سرعان ما أخفته خلف برودها المعتاد وقالت:

— أيوة...

اختارك.

وإنتِ كسبتي.

يبقى المفروض تعيشي مرتاحة وسعيدة.

مش تفضلي طول عمرك خايفة من ست سابتلك كل حاجة ومشيت.

لم تجد كوثر ردًا للحظات.

فاستغلت رقية صمتها وأشارت إلى الباب مرة أخرى.

— العزاء تحت يا كوثر.

والناس كلها موجودة.

بلاش تعملي فضيحة في يوم دفنة الراجل اللي كان في يوم من الأيام أخو جوزك.

ظلت كوثر تنظر إليها بنظرات مشتعلة.

ثم استدارت بعنف واتجهت نحو الباب.

وقبل أن تخرج التفتت إليها قائلة:

— أنا حذرتك.

لو فكرتي تقربي من إبراهيم هتندمي.

ابتسمت رقية بمرارة وهي تجيب:

— اطمني...

أنا اتعلمت من زمان إن الحاجات اللي بتضيع من إيدينا ما بترجعش تاني.

خرجت كوثر وصفقت الباب خلفها بقوة.

أما رقية فبقيت واقفة مكانها للحظات.

ثم سقطت دمعة وحيدة من عينها وهمست بصوت مكسور:

— يا ترى ضاع مني إبراهيم فعلًا...

ولا ضاع مني عمري كله؟

---

جلست على السرير بوهن، تتأمل مصيرها المجهول.

راودتها فكرة، فأخرجت هاتفها من الحقيبة، واتصلت بأخيها رائف في سويسرا.

كان قد طُرد من بيت العائلة بعدما تحدى عمها، ورفض أن يخضع لسطوته، لأنه أحب فتاة بسيطة لا تليق ـ في نظر العمروسي ـ بمقامهم.

رد رائف بصوت ناعس، لكن قلقه اشتعل حين سمع بكاءها:

– رقية، مالك؟ حصل إيه؟

قالت وهي تختنق بالدموع:

– سامي مات… وأنا في مصر.

انتفض رائف:

– مات؟ إمتى؟ وليه ما بلغتيش؟

أجابت بصوت متهدج:

– من ثلاث أيام وأنا بحاول أوصلك… أنا محتجاك يا رائف.

نهض من فراشه وقال مهدئًا:

– اهدي، أنا هحجز أول طيارة، وهكون عندك قريب.

لكنها تمتمت بين بكائها:

– أنا مش عارفة أروح فين.

سألها بحدة:

– عمك ضايقك؟ حد من البيت؟

أومأت وهي تجفف دموعها:

– كوثر دخلت عليّ من شوية، طردتني، وهددتني تبعدني عن بنتي… قالت إن سامي كفّى ووفّى.

قال رائف بحزم:

– خليكي في الفيلا لحد العزاء ما يخلص. أنا جاي، وكل شيء هيتحل.

همست برجاء:

– ما تتأخرش عليّ.

– حاضر، ما تقلقيش.

أغلقت الخط، ثم أسرعت إلى ابنتها، تخشى أن تمتد يد كوثر إليها.

---