سقطت في حبك رغمًا عني

الفصل الأول

العريس الهارب من الزواج

"لو مرحتش النهارده... هعتبر إن معنديش ابن!"

دوّى صوت رحاب عاصم في أرجاء فيلا اللواء محمود فوزي، وهي تضرب كفها فوق الطاولة بعصبية.

رفعت نظرها إلى زوجها اللواء محمود فوزي، الذي كان يطالع الجريدة بهدوء وكأن شيئًا لم يحدث.

قالت بانفعال:

— اعمل إيه مع ابنك؟ واحد وتلاتين سنة ولسه كل ما أفتح معاه سيرة الجواز يهرب!

أنزل محمود الجريدة وتنهد.

— يا رحاب... إنتِ عارفة خالد كويس. حياته كلها شغل، ومن يوم دخل الكلية الحربية وهو مش شايف غير العسكرية.

هزت رأسها بعناد.

— وأنا أستناه لحد إمتى؟ كل اللي في سنه اتجوز وخلف، وأنا نفسي أشوف عياله قبل ما أكبر.

ابتسم محمود ابتسامة خفيفة.

— هو لسه صغير.

رمقته بنظرة حادة.

— صغير؟! بالنسبة لك يمكن... لكن بالنسبة لي لا.

ثم أخرجت هاتفها وقالت بثقة:

— خلاص... أنا لقيتله العروسة المناسبة.

رفع محمود حاجبيه.

— عملتيها؟

ابتسمت بانتصار.

— نيهال كلمتني... بنت ناس جدًا... اسمها علياء، آخر سنة في طب، وأهلها من أكبر العائلات.

تنهد محمود.

— وسألتي خالد؟

ضحكت رحاب.

— لو سألته هيرفض قبل ما يسمع اسمها.

هز محمود رأسه مستسلمًا.

— ربنا يستر.

---

في الجهة الأخرى...

داخل الكلية الحربية...

وقف الضابط خالد محمود فوزي يتابع تدريب الجنود الجدد بنظرات حادة.

كان في الحادية والثلاثين من عمره، طويل القامة، يتمتع بشخصية قوية وانضباط شديد، حتى إن الجميع كان يعرف أنه لا يقبل أي تهاون أثناء العمل.

نشأ خالد في بيت عسكري، فوالده اللواء محمود فوزي إسماعيل، أحد أشهر ضباط الجيش المصري، ولذلك تربى منذ صغره على الانضباط وتحمل المسؤولية، حتى أصبحت حياته كلها تدور حول عمله.

أما الحب والزواج...

فكانا آخر ما يفكر فيه.

اقترب منه صديقه المقرب يوسف أحمد حازم، الذي رافقه منذ أيام الثانوية العامة، ثم دخلا الكلية الحربية معًا، وأصبحا يعملان في المكان نفسه.

نظر يوسف إلى وجه خالد ثم ابتسم.

— مالك يا عم؟ وشك عامل كده ليه؟

تنهد خالد بضيق.

— أمي...

ضحك يوسف.

— مالها؟

أجاب خالد وهو يهز رأسه.

— مصممة تجوزني.

ابتسم يوسف ابتسامة واسعة.

— يا عم هو حد يلاقي ست الحبايب بتجيبله عروسة ويقول لأ؟ تصدق إنك وش فقر!

نظر إليه خالد باستنكار.

— تصدق إنك فايق ورايق؟ أنا بتكلم جد وإنت قاعد تهزر.

ضحك يوسف أكثر.

— طب ما هو الجواز مش نهاية الدنيا.

زفر خالد بضيق.

— بالنسبة لك يمكن... لكن بالنسبة لي لأ. أنا مش ناقص مسؤوليات زيادة.

نظر إليه يوسف مبتسمًا.

— طب وبعدين؟ ناوي تفضل كده لحد إمتى؟

أجابه خالد بثقة.

— لحد ما أبقى أنا عاوز... مش لما حد يقرر عني.

انفجر يوسف ضاحكًا وهو يربت على كتف صديقه.

— خلاص يا سيدي متزعلش، بس بصراحة أنا شايف إن خالتو رحاب عندها حق، إنت طول عمرك شغل وبس، أمال هتعيش لنفسك إمتى؟

تنهد خالد وهو ينظر إلى الجنود الذين يتدربون أمامه، ثم قال بهدوء:

— أنا مرتاح كده يا يوسف... شغلي أهم عندي من أي حاجة تانية.

ابتسم يوسف بخبث.

— متأكد؟ ولا خايف تقع في الحب؟

التفت إليه خالد بسرعة، ثم ضحك بسخرية.

— حب؟! أنا آخر واحد ممكن يفكر في الكلام ده.

رفع يوسف حاجبيه.

— والله الأيام دي مبتسيبش حد.

هز خالد رأسه وهو يبتسم ابتسامة خفيفة.

— الأيام دي تعمل اللي تعمله... لكن أنا مستحيل أتجوز دلوقتي.

تنهد يوسف باستسلام.

— ربنا يهديك.

وبعد لحظات من الصمت، تذكر يوسف أمرًا، فسأله:

— إجازتك إمتى يا بني؟

نظر إليه خالد وقال:

— تقريبًا راجع البيت بكرة... وبعيد عنك مش عاوز أرجع، عاوز أفضل هنا، لحسن أمي لو لمحتني بس هتعملي كمين.

انفجر يوسف ضاحكًا.

— يخرب عقلك! في حد يقول كده على أمه؟

تنهد خالد.

— هي عارفة إني مش عاوز أتجوز، وبرضه كل شوية نفس الكلام.

ابتسم يوسف.

— ربنا يعينك.

انتهى يوم العمل، وغادر خالد الكلية الحربية متجهًا إلى منزله بعد انتهاء مهمته.

كان يعلم أن عودته هذه المرة لن تكون سهلة، فوالدته لن تترك فرصة إلا وستعيد فتح موضوع الزواج من جديد.

ابتسم بسخرية وهو يقود سيارته.

— ربنا يستر...

---

وفي منزل اللواء محمود فوزي...

كانت رحاب ما تزال تنتظر اتصال صديقتها نيهال.

لم يمر وقت طويل حتى رن هاتفها.

أجابت سريعًا.

— أيوة يا نيهال.

ابتسمت نيهال وهي تقول:

— لقيتلك العروسة.

اعتدلت رحاب في جلستها.

— بجد؟ مين؟

— اسمها علياء.

عقدت رحاب حاجبيها محاولة تذكر الاسم.

— واسم أبوها؟

— محمد هادي... صاحب أكبر شركة بناء في مصر، وأمها فريدة محمد حسام صاحبة مركز التجميل.

ابتسمت رحاب فورًا.

— آه... عارفاهم. ناس محترمين جدًا.

ثم أضافت بحماس:

— والله البنت وعيلتها كويسين.

تنهدت بعدها وهي تقول:

— بس على الله خالد يرجع من السفر بدري علشان أخليه يشوف البنت.

ابتسمت نيهال.

— براحتك... بس بسرعة علشان أرد على فريدة، إنتِ عارفة إنها مبتحبش الانتظار.

— حاضر... هكلمك أول ما أشوفه.

أنهت رحاب المكالمة، وعلى وجهها ابتسامة رضا، بينما كان محمود ينظر إليها مبتسمًا.

— شكلك بدأتي تنفذي الخطة.

ابتسمت بثقة.

— المرة دي مش هيفلت مني.

ضحك محمود وهو يهز رأسه.

— ربنا يعين خالد.

---

وفي منزل محمد هادي...

كانت علياء تجلس في غرفتها، غارقة بين الكتب والمراجع الطبية.

لم يبقَ سوى أشهر قليلة على تخرجها من كلية الطب، وكانت تبذل كل جهدها حتى تحقق حلمها بأن تصبح طبيبة أطفال.

كانت تؤمن أن الطفل لا يستطيع التعبير عن ألمه، ولذلك كانت تشعر بمسؤولية كبيرة تجاه هذا التخصص.

أما في الغرفة المجاورة...

فكانت سارة تجلس أمام مكتبها، تحيط بها كتب الثانوية العامة من كل جانب.

أمسكت قلمها، ثم بدأت تحل بعض مسائل الرياضيات.

كانت تعشق الأرقام والحسابات منذ طفولتها، وتحلم بأن تصبح يومًا ما صاحبة أكبر شركة استثمار، مثل والدها الذي كانت تعتبره قدوتها في الحياة.

طرق والدها الباب بخفة، ثم دخل وهو يحمل كوبًا من العصير.

ابتسم وهو يضعه أمامها.

— عاملة إيه يا حبيبتي؟

ابتسمت سارة.

— الحمد لله يا بابا... قربت أخلص.

جلس بجوارها.

— عارف إن بنتي هتجيب مجموع يفرحني.

ضحكت بخجل.

— إن شاء الله.

في تلك اللحظة، مر صوت فريدة من خارج الغرفة.

— أنا خارجة على المركز... متستنونيش.

خرجت مسرعة كعادتها.

تابعتها سارة بعينيها في صمت.

لاحظ محمد هادي ذلك.

ربت على كتف ابنته برفق.

— متزعليش... إنتِ عارفة طبيعة شغل مامتك.

ابتسمت ابتسامة صغيرة، لكنها لم تُخفِ ما بداخلها من حزن.

فمنذ سنوات...

وأصبحت والدتها تمنح عملها الوقت والاهتمام، بينما كانت الأسرة تأتي دائمًا في المرتبة الثانية.

---

عاد خالد إلى منزله بعد انتهاء فترة عمله، وما إن دخل حتى استقبله الجميع بحفاوة.

ابتسمت رحاب وهي تقترب منه.

— حمد لله على السلامة يا حبيبي.

ابتسم خالد وقبّل رأسها.

— الله يسلمك يا ماما.

صافح والده باحترام، ثم جلس بجواره، بينما اقترب عمر منه مبتسمًا.

— وحشتني يا باشا.

ربت خالد على كتفه وهو يضحك.

— وإنت كمان يا واد.

جلس الجميع حول مائدة الغداء، يتبادلون الحديث في جو عائلي هادئ.

كان خالد يتحدث مع والده عن العمل، بينما كانت رحاب تراقبه بين الحين والآخر وكأنها تنتظر اللحظة المناسبة.

وبعد دقائق...

قالت بهدوء:

— خالد يا حبيبي...

رفع رأسه إليها.

— نعم يا ماما؟

ابتسمت بحنان.

— عاوزاك النهارده توصلني النادي... وتقعد معايا شوية.

نظر إليها باستغراب.

— النادي؟

أومأت برأسها.

— أيوة... بقالي كتير مخرجتش معاك.

ابتسم خالد.

— بس أنا كنت ناوي أرتاح النهارده.

أمسكت رحاب بيده وهي تدلل عليه كعادتها.

— جرى إيه يا خالد؟ عاوزة أخرج معاك شوية... دايمًا كاسر بخاطري كده.

لم يستطع أن يرفض طلبها.

تنهد ثم ابتسم.

— حاضر يا ماما... اللي إنتِ عاوزاه.

اتسعت ابتسامتها.

— ربنا يخليك ليا.

ثم نظرت إليه نظرة ذات مغزى وقالت:

— في حاجة واحدة بس هي اللي هتفرحني بجد... وإنت عارفها.

اختفت الابتسامة من على وجه خالد فورًا.

تنهد بضيق.

— جرى إيه يا ماما؟ هو إحنا هنعيد ونزيد؟

ساد الصمت.

ثم أكمل بحزم:

— قلتلك قبل كده... أنا مش هتجوز.

نظرت إليه رحاب بحزن.

— ليه يا ابني؟ كل أم نفسها تشوف ابنها مستقر.

أجابها بهدوء، لكن بنبرة لا تقبل النقاش.

— أنا مش مستعد للجواز دلوقتي.

تدخل اللواء محمود فوزي محاولًا تهدئة الموقف.

— جرى إيه يا بني؟ الكلام أخد وعطا... وأمك عاوزة مصلحتك.

هز خالد رأسه.

— عارف يا بابا... لكن ياريت محدش يضغط عليا في الموضوع ده.

ثم وقف من مكانه.

— عن إذنكم... أنا شبعت.

ترك المائدة واتجه إلى غرفته، بينما بقيت رحاب تنظر إلى أثره بحزن.

تنهد اللواء محمود وهو يلتفت إلى زوجته.

— شوفتِ؟

قالتها وهي تعقد ذراعيها بثقة:

— ولا يهمك... هيوافق.

ابتسم محمود ساخرًا.

— إنتِ لسه عند رأيك؟

قالت بثقة أكبر:

— طبعًا... ابني مهما قال لأ، أنا متأكدة إنه لما يقابل البنت المناسبة هيغير رأيه.

هز محمود رأسه وهو يبتسم.

— ربنا يستر بس من اللي ناوية تعمليه.

ابتسمت رحاب ابتسامة غامضة...

دون أن تعلم أن القدر كان يخبئ للجميع مفاجآت لم يتوقعها أحد...

يتبع...