الفصل الخامس

دخلت عاليا المنزل والبهجة تملأ كيانها، وغادر حسام وهو يشعر بأنه يملك العالم. أما ذلك الشخص الآخر، فقد كان يكاد يحترق من الغضب.. لكن من يبالي به؟

صعدت عاليا إلى غرفتها، غسلت وجهها وأدت صلواتها بقلب خفيف، ثم استلقت على فراشها لتستسلم لسبات عميق مريح لم تذقه منذ أشهر.

في الصباح التالي، بدأت خيوط الشمس تتسلل عبر الستائر، ودخلت الأم الغرفة تهز كتف عاليا برفق:

— "عاليا.. عاليا، اصحي يلا."

تمتمت عاليا وهي تقلب وجهها في الوسادة: "اممم.. أيوة يا ماما."

— "اصحي يلا كل دا نوم؟ إحنا بقينا الظهر!"

— "شوية بس يا ماما.. خمس دقائق."

ضحكت الأم وقالت وهي تشير إلى الطاولة: "تليفونك عمال يتهز من بدري ومفصلش.. أنتِ مكهرباه ولا إيه؟ ."

قفلت عاليا فجأة واعتدلت في فراشها بنشاط مريب: "تليفوني؟! هو فين؟"

نظرت إليها الأم بتعجب: "مالك اتخضيتِ كده ليه؟!"

تلعثمت عاليا محاولةً استعادة هدوئها: "لا.. لا أبداً، بس محدش بيرن عليا عادة، قلت أكيد في حاجة.. وريني كده؟ أممم.. دي مي، أكيد عاوزه توريني الفستان."

ضغطت زر الرد بسرعة: "ألو.. صباح الخير يا ميوشة."

جاءها صوت مي لاهثاً وعاتباً: "صباح الخير! إيه يا بنتي فينك؟ برن عليكي من بدري، وحسام كمان قلق جداً لما مردتيش!"

شعرت عاليا بنغزة دافئة في قلبها لاهتمام حسام، وقالت بأسف: "معلش.. نسيته سايلنت من امبارح وكنت نايمة مسمعتوش."

— "طيب عدي عليا في الأتيليه شوفي التصميم علشان أبتدي فوراً، مفيش وقت."

— "خلاص، هلبس واجيلك على طول.. باي."

أغلقت الخط والتفتت لتجد أمها تراقبها بابتسامة حنونة، فقالت عاليا وهي تنهض: "أنا نازلة يا ماما النهارده كمان."

قالت الأم بنبرة تساؤل: "أنتِ نازلة النهارده كمان؟"

أخذت عاليا نفساً عميقاً وقالت بقوة: "آه يا ماما.. وعلى فكرة، أنا كلمت عمو وهنزل الشغل من الأسبوع الجاي، يعني اتعودي على خروجي بقى من هنا ورايح."

ابتسمت الأم واقتربت لتملس على شعرها: "ماشي يا حبيبتي، اعملي اللي يريحك.. أنا بس عاوزه أطمن عليكي."

قالت عاليا بيقين وهي تنظر لمرآتها: "اطمني يا ماما.. أنا كويسة وهبقى أحسن. محدش بيتعلم ببلاش، وأهي تجربة وعدت."

"إن التجارب القاسية لا تمر في حياتنا مرور الكرام، بل تترك في أعماقنا آثاراً لا تُمحى؛ بعضها يعلمنا كيف نكون أقوى في المستقبل، وبعضها الآخر يترك جرحاً غائراً يوجعنا مدى الحياة.. لكننا في النهاية ننهض."

وصلت عاليا إلى الأتيليه بخطى واثقة، ودخلت ضاحكة:

— "صباح الخير.. وحشتيني يا ميوشة!"

التفتت إليها مي وسحبتها من يدها بلهفة: "أنتِ كمان والله وحشتيني.. بس تعالي شوفي كدا الأول التصميم دا."

نظرت عاليا إلى الرسمة، فبرقت عيناها بإعجاب، لكن ملامحها سرعان ما تبدلت، وقالت بتردد: "الله.. حلو أوي يا مي، بس..."

سألتها مي بقلق: "إيه في إيه؟!"

— "مفتوح أوي يا مي.. هلبسه إزاي دا؟! لا، قفليه واعملي له أكمام."

ضربت مي كفيها ببعضهما باعتراض: "الله يا عاليا! كدا بقى تصميم تاني خالص ومينفعش.. بعدين مش لسه قايلة حلو؟!"

أجابتها عاليا بهدوء وثقة: "حلو.. بس مش ليا يا مي. أنا مش هلبس حاجة زي دي خلاص.. اعملي لي أي حاجة تانية بسيطة، مش لازم تصميم مخصوص."

في تلك اللحظة، فُتح الباب ودخل حسام، وكان قد سمع الجزء الأخير من حديثهما، واسترعى انتباهه تفكير عاليا وكلامها الذي نزل على قلبه كالغيث. ابتسم وسأل بمرح:

— "إيه؟ بتتخانقوا ليه على الصبح؟"

التفتت إليه مي متذمرة: "تعال شوف يا حسام.. مش عاجبها التصميم!"

ردت عاليا مدافعة عن وجهة نظرها: "مش حكاية مش عاجبني، هو بس مش مناسب ليا.. اتكسف ألبس دا، وكمان مفتوح أوي.. أنا أصلاً بفكر أتحجب من مدة، أقوم ألبس دا؟ لا يا مي."

تدخل حسام لينهي النقاش بلهجة حاسمة، وعيناه تلمعان بالفخر بها: "خلاص يا مي، سبيها براحتها.. وبعدين فعلاً الفستان عريان أوي، دا لو كان عجبها أنا كنت قطعتهولكم!"

انفجرت عاليا ضاحكة: "ههههههههه."

هزت مي رأسها بتفكير: "أنتم مجانين اصلاً! بس تصدقي؟ فكرة مش وحشة.. وهتشوفي التعديل اللي هعمله هيطلع إزاي. سيبوني لوحدي شوية بقى خلوني أركز."

تحرك حسام مشيراً لعاليا: "ماشي.. تعالي يا عاليا نقعد هناك على الكنبة دي."

جلسوا معاً، فنظر إليها حسام بتمعن وسألها بنبرة حنونة: "أنتِ كويسة؟"

— "أيوة، الحمد لله."

— "في حاجة زعلتك امبارح؟ البيت معجبكيش؟ حد من أهلي زعلك أو أنا عملت حاجة ضا..."

قاطعته عاليا بابتسامة دافئة رداً على سيل أسئلته القلقة: "إيه دا كله يا حسام؟! لا أبداً مفيش حاجة خالص، بالعكس.. امبارح كان يوم لطيف جداً، وأهلك طيبين أوي ودخلوا قلبي بسرعة.. وأنت كمان طيب أوي وكويس جداً معايا."

تنهد بارتياح ثم عاد يعاتبها برقة: "طيب ليه مردتيش عليا الصبح ولا بالليل؟ قلقتيني عليكي جداً.. أنا كنت خلاص هجيلك البيت!"

نظرت إليه بأسف صادق: "سوري يا حسام.. أنا عملت التليفون سايلنت ونمت، ومكنتش أعرف إنك هتتصل. وصحيت متأخر على مكالمة مي وجيت على طول وملحقتش أكلمك.. أنا آسفة."

لوح بيده مبتسماً: "خلاص ولا يهمك، المهم إنك كويسة.. ها، مستعدة؟"

نظرت إليه بعدم فهم: "لإيه؟"

غمز لها بخفة: "لفسحة النهارده!"

اتسعت عيناها بدهشة: "أنت بجد عاوز تخرجني كل يوم؟ أنا كنت فاكراك بتهزر!"

رد بنبرة جادة وصادقة: "أنا مبهزرش.. وأه، أخرجك لي لأ؟"

تابعت بتردد: "مش عاوزه أتعبك أو أعطلك عن شغلك.."

— "ما تعطليني إيه المشكلة؟ وبعدين مفيش عطلة ولا حاجة، أنا هخلص الشغل ونخرج فوراً."

— "بس أنت هتكون تعبان ومرهق.. متتعبش نفسك زيادة علشاني."

اقترب منها قليلاً، وقال بصوت منخفض يقطر عذوبة: "مش هتعب.. وبعدين تعبي كله يهون لما أشوفك بتضحكي."

توردت وجنتا عاليا، وأنزلت رأسها قائلة بخجل: "مـ.. ميرسي يا حسام."

وقف حسام مستعداً للمغادرة: "طيب، أنا هروح أخلص شغلي، وأشوفك الساعة 7 في الكافيه بتاع امبارح.. باي."

مرت الأيام سريعة ومتلاحقة، وكان هذا الأسبوع مليئاً بال أحداث الجميلة التي أعادت الروح لعاليا. ذهبا معاً إلى الكورنيش، ووقفا على كوبري قصر النيل يستمتعان بنسمات الهواء، وركبا مركباً نيلياً صغيراً، وزارا الحدائق العامة والكافيهات الراقية. لقد كان أسبوعاً حافلاً استطاعت فيه عاليا، بفضل وجود حسام، أن تخرج من حالتها النفسية السيئة وتبدأ في التعافي.

تقرّب منها حسام كثيراً، وأصبحت لقاءاتهما يومية، تخللتها مكالمات دائمة ومشاورات مع مي حول الفستان. في المقابل، كان حازم يحاول مراراً وتكراراً الاتصال بها أو الحديث معها، لكنها كانت تصده ببرود قاتل، بينما كانت ليلي تشعر بغيظ مكتوم وبأن الأمور تفلت من بين أصابعها.. حتى أتى اليوم الموعود؛ يوم الحفل.

قالت عاليا عبر الهاتف بلهفة: "بقولك إيه.. متتأخريش بقى أنتِ وحسام."

ردت مي: "خلاص ماشي، مسافة الطريق."

في قاعة الحفل الراقية، كانت الأنوار تتلألأ والموسيقى تملأ المكان. بدأت عاليا في الهبوط من على درجات السلم، وكانت تخطف الأنفاس؛ ترتدي فستاناً أسود طويلًا، بسيط الخطوط لكنه غاية في الأناقة والاحتشام، فستاناً يبرز جمالها الطبيعي دون تكلف. كانت ببساطتها الشديدة أجمل من في المكان، بل وأجمل من العروس نفسها، مما أثار غيرة عارمة وضيقاً شديداً في قلب ليلي التي كانت تراقبها بحقد.

اقتربت منها والدتها ودمعت عيناها فرحاً: "قمر يا عاليا.. عقبالك يا حبيبتي."

ابتسمت عاليا وهي تلتفت بعينيها نحو الباب بترقب: "ميرسي يا ماما."

لاحظت الأم نظراتها وسألتها: "بتدوري على حاجة؟"

— "